Allen^a) den, die disen brief ansehent lesent oder ho^erent lesen, kúnd ich Hugo Hofakrer burger ze sant Gallen vnd vergich offenlich mit || disem brieue fúr mich fúr alle min erben vnd nachkomen von der sto^esse vnd misshellung wegen, die ich gehept han vntz her vff disen húttigen || tag, alz dirre brief ist geben, mit den ersamen gaistlichen fro^vwen fro Elzbethen Eggrichinen ze disen ziten a^ebtissenne vnd dem conuent gemain||lich dez closters ze Maggeno^vw¹ gelegen in Costentzzer bystům von dez wasserganges vnd wasserflusses wegen, der da gat v´ber minen tail dez gůtes ze Wolffriswille², daz man nemmet der Kurer gůt, daz o^vch von der selben Kurer gůt ze Wolffriswille zv^o etlichen ziten getailt ward, der selb wasserfluss v´ber daz vorgedaht min gůt gât in ainem graben an der vorgeschribenen miner fro^vwen vnd dez selben closters múli ze Maggeno^vw, den selben wasserfluss ich den vorgedahten minen fro^vwen ze etlichen ziten vff dem vorgeschribenen minem gůt gewendet vnd ab geworffen han. Sid aber ich nv mit den vorgedahten minen fro^vwen der a^ebtissennen vnd dem conuent gemainlich dez selben closters ze Maggeno^vw in frúntschaft vnd in gnad komen bin, so han ich angesehen der fúrsihtigen wisen dez burgermaisters der ra^et vnd ander miner frúnd vnd erberer lút ze sant Gallen ernstlichen bet vnd han den vorgedahten minen fro^vwen der a^ebtissennen vnd dem conuent gemainlich dez vorgeschribenen closters ze Maggeno^vw vnd allen iren nachkomen vnd dem selben closter ze Maggeno^vw luterlich durch got vnd durch miner vnd aller miner vordem selen nutz vnd hailes willen fúr mich fúr alle min erben vnd nachkomen die gnâd getan, daz sv´ vnd alle iro nachkomen den vorgeschribenen wasserfluss vnd wassergang in dem graben, alz er biz her vff disen húttigen tag, alz dirre brief ist geben, v´ber minen tail dez vorgeschribenen gůtes ze Wolffriswille, daz man nemmet der Kurer gůt, vntz an die vorgeschribenen iro múli ze Maggeno^vw bi dem closter gelegen gangen ist, hinnenhin iemer mêr êweklich wisen vnd laiten súllent vntz an die vorgeschribenen iro múli ze Maggeno^vw, vnd daz ich noch enkain min erben noch nachkomen, in dero hant der selb min tail dez vorgeschribenen gůtes, daz man nemmet der Kurer gůt, iemer kumpt, die vorgedahten min fro^vwen noch dehain iro nachkomen noch daz vorgeschriben closter ze Maggeno^vw daran niemer mer súllent noch wellent ansprechen vftriben bekúmberren bekrenken noch in kain wis beswa^eren weder mit gaistlichem noch mit weltlichem geriht noch ân reht noch mit enkainer lay ander sachen an alle geua^erde noch nieman andre an v´nser stat noch von v´nsern wegen. Ich Hugo Hofakrer da vorgenemt han o^vch willeklich gelobt mit miner trúwe vnd loben mit disem brieue fúr mich vnd fúr alle min erben, dez vorgeschribenen wasserflusses vnd wasserganges, alz verre er v´ber minen tail dez vorgeschribenen gůtes, daz man nemmet der Kurer gůt, gât vnd gan sol, reht wer ze sinne nach dez landes reht vnd o^vch die vorgedahten min fro^vwen die a^ebtissennen vnd den conuent gemainlich dez vorgeschribenen closters ze Maggeno^vw vnd iro nachkomen darumb ze versprechenn vnd ze versta^enne an allen stetten gen aller ma^englichem âne allen iren schaden, wenn wa vnd wie dik sv´ darumb angesprochen geschadgot oder vfgetriben werdent mit dem rehten. Vnd ze vrkúnd der warhait aller der vorgeschribenen dinge vnd vergiht so han ich Hugo Hofakrer da vorgenemt fúr mich fúr alle min erben vnd nachkomen min aigen insigel offenlich gehenkt an disen brief. Vnd ze merer sicherhait der selben dinge so han ich erbetten die erbern wolbeschaiden V^olrich Ru^edger burgermaister ze sant Gallen³ vnd Hainricen Garnleder den schriber burger ze sant Gallen, daz sv´ irú insigel zv^o minem insigel ze ainer gezúgnust der vorgeschribenen dinge offenlich gehenkt hant an disen brief inen vnd allen iren erben gantzlich vnscha^edlich. Diz beschach vnd ward dirre brief geben ze Maggeno^vw an dem na^ehsten ma^entag vor v´nser fro^vwen tag ze mittem o^vgsten in dem jar, do man zalt von Cristus gebúrt drúzehenhundert jâr, ahtzig jâr vnd darnach in dem dritten jare.

Source Fulltext: Chartularium Sangallense X, Nr. 5964, S. 136-137.