Ich^a) Johans von Klingenberg¹ ritter tůn kunt vnd vergich offenlich an disem brief fúr || mich vnd min erben, daz ich den beschaidnen Johansen dem Ho^ern burger ze sant Gal||len, Aidelhaiten siner êlicher wirtinn, Margaretun, Englun vnd Cůnraten iren || êlichen kinden reht vnd redlich verlihen han vnd lihe inen allen fúnfen mit disem gegenwúrtigen brief den zehenden ze Maldisdorff² mit aller rehtung vnd zůgeho^erd, der von mir lehen ist, allen fúnfen gemainlich vnd vnuerschaidenlich doch also, wenn ie das eltost vnder den selben fúnf personen von to^vdes wegen abgangen ist, das denn darnach aber das eltost vnder den vorbenenten personen den obgenanten zehenden ze Maldisdorf im selber vnd den andren êgenanten personen, die dennoht in lib sint, allen gemainlich vnd vnuerschaidenlich von mir oder von minen erben, ob ich enwa^er, enpfahen sol. Vnd des ze ainem waren vrkúnd so han ich min aigen insigel fúr mich vnd min erben offenlich gehenkt an disen brief. Der geben ist ze sant Gallen in der statt an dem na^ehsten do^vnstag vor aller hayligen tag in dem iâr, do man zalt von Cristus gebúrt drútzehenhundert iâr vnd darnach in dem drú vnd ahtzigosten jâre.

Source Fulltext: Chartularium Sangallense X, Nr. 5976, S. 147-148.