Allen^a) den, die disen brieff ansehent lesent oder ho^erent lesen, kúnde ich Herman Egger burger ze sant Gallen vnd vergich offenlich || an disem brief fúr mich vnd min erben, das ich mit gůter vorbetrahtunge vnd von miner rêdlicher not wegen reht vnd rêdlich ver||ko^vfft vnd ze ko^vffenn geben han den fúrsichtigen wîsen dem burgermaister dem rât vnd den burgern allen gemainlich armen || vnd richen der stat ze sant Gallen vnd iren erben vnd nâchkomen die kemnaten, die ze sant Gallen vff Irer tor¹ stât, das kornhus ob der selben kemnaten, als wit vnd als verre die selb kemnat v´ber sich v^f begriffen hat, vnd den estrich ob dem selben kornhus, als wit vnd als verre die selb kemnat vnd kornhus v´ber sich v^f begriffen hant, die selb kemnat ainhalb vnd nebent zů sto^vsset an min kemnaten, die selben vorgedâhten kemmnaten das kornhus vnd estrich, als vor ist beschaiden, vnd was die selb kemnat v´ber sich v^f begriffen hat, han ich in mit allen rehten vnd zůgeho^erden ze ko^vffenn geben vmb vierzig pfunt pfenning gůter vnd gena^emer Costentzer múnse, dero ich gantzlich vnd gar nâch minem willen von in gewert vnd bezalt bin an den stetten, da ich minen wahsenden schaden mit verkomen han, die selben kemnaten das kornhus vnd den estrich han ich in ze ko^vffenn geben dafúr vnd in dem rehten, das niht darab gât noch gan sol weder lútzel noch vil, vnd darvmb so han ich mich frilich willeklich vnd offenlich verzigen vnd verzihe mich mit disem brief fúr mich vnd alle min erben aller aigenschaft aller lehenschaft aller kuntschaft aller gewêr lút vnd brief alles rehtes gaistlichs vnd weltlichs gerihtes aller vordrung vnd ansprachen, so ich ald min erben, ob ich enbin, an den zů den vnd von der vorgedâhten kemnaten kornhus vnd estrichs wegen ie gehept habent oder hienach iemer gehaben oder gewinnen mo^ehtint. Sunderlich ist berett, das ich vnd min erben, ob ich enbin, den vorgedâhten burgern vnd der stat ze sant Gallen gemainlich vnd iren wahtern mit miner hûstúr gewa^ertig sin so^ellin in aller wise als vormals, ê dirr ko^vff beschehen wa^er. Si mugent o^vch vff die stegen vor miner hustúr ain stegen rihten vnd setzen gegen den selben kemnaten kornhus vnd estrich, das si ainen gang dar v^f vnd darab habint vnd haben mugint, vnd wenne si die selben stegen gesetzt vnd dar geriht hant, so so^ellin ich noch min erben noch nâchkomen inen noch iren wahtern dannanhin mit der vorgedahten miner hûstúr niht fúrbass gewa^ertig noch gebunden sin denn als ander burger ze sant Gallen ân alle geua^erde. Si mugent o^vch ob dem vnd vff dem vorgeschriben estrich, als wit die selb kemnat vnd kornhus v´ber sich v^f begriffen hant, buwen, was si wênt oder was in vnd der stat ze sant Gallen fůgklich ist, aber ich noch min erben noch nâchkomen so^ellint noch mugent ob dem noch vff dem selben estrich vsserthalb den kraissen, als die selb kemnat v´ber sich v^f begriffen hât, niht buwen weder klain noch gross, es bescheh denn mit aines burgermaisters vnd des râtes ze sant Gallen gemainlich ald mit dem mêrtail vnder in gůtem willen gunst vnd vrlob. Si sont o^vch ob dem noch vff dem selben vorgeschriben estrich vsserthalb den kraissen, als die selb kemnat vber sich v^f begriffen hât, niht buwen dehainerlay bûw denn mit minem vnd miner erben vnd nâchkomen gůtem willen gunst vnd vrlob, es wa^er denn, das so^elich lo^eff v^ff stu^endint, das den rât ze sant Gallen notdurfftig duhti, das man das selb Irer tor bas versorgen solti, so sont vnd mugent si ie dann vff dem selben estrich, als wît er begriffen hât, brustwêrina vnd sa^emlich bûw setzen, das das selb tor vnd die stat dester werlicher beliben mug. Darzů han ich o^vch gelopt vnd loben mit disem brief fúr mich vnd min erben, der vorgeschribnen kemnaten des kornhus vnd des estrichs, als vor ist beschaiden, vnd des ko^vffs reht wer ze sinne nâch der stat ze sant Gallen reht vnd gewonhait vnd die obgedahten burger von sant Gallen gemainlich vnd sunderlich vnd ir erben vnd nâchkomen darvmb ze versprechenn vnd ze versta^ende vff gaistlichem vnd vff weltlichem geriht, wenn wâ oder wie dik si des bedurffent ald darvmb von iemann angesprochen oder v^fgetriben werdent. Vnd ze offemm wâren vrkúnde vnd ze ainer sta^eter sicherhait aller vorgeschribner dinge vnd vergiht so han ich Herman Egger da vorgenemt fúr mich vnd fúr alle min erben vnd nâchkomen min insigel offenlich gehenkt an disen brief. Der ist geben ze sant Gallen an dem na^ehsten ffritag vor sant Gregorien tag des hailgen bapstes in dem iâre, do man zalt von Cristus gebúrt drúzehenhundert jâre vnd darnach in dem viervndahtzigosten jâre.

Source Fulltext: Chartularium Sangallense X, Nr. 6003, S. 179-180.