Wir^a) der vogt vnd der rate der statt ze Rapreswil¹ thůnt kunt mit disem brief allen den, die in ansehent oder ho^erent || lesen, als Eberhart der Wu^est burger ze Rapreswil Clausen sinen svn gen Rúti² in daz closter getan hatt vnd im || da ein pfrůnd gewunnen vnd kůft hatt von dem abte vnd sinem gotzhus vmb drissig pfund pfenning Zúri||cher múntz, dar vnder aber etwas misshellung vfgelo^vffen ist, also verre daz der selb Claus Wu^est wider vrpflichtz vsser dem selben closter vnd gotzhus gangen vnd komen ist vnd nicht mere dar in komen sol, vnd vmb die selben sach sto^eß vnd misshellung, so zwúschent dem erwirdigen herren dem abte von Rúti vnd sinem gotzhus vnd o^vch Eberhart Wu^esten vnd Clausen sinem svn warent, der selben sto^eß kament si ze beiden teile willenklich vff, wie wir si mit enander v´ber ein bra^echtint vnd verrichtint, da bi solten sú beliben vnd daz war vnd stet han nv vnd hie nach, vnd nach ir beider teile red vnd widerrede so haben wir sú lieblich mit enander v´ber ein bracht vnd vmb alle sachen gentzlich verricht vnd důcht v´ns o^vch bi gůten trúwen weger getan denne vermitten, vnd also daz der vorgenant abte von sins gotzhuß wegen ze Rúti Eberhart dem Wu^esten drissig pfund pfenning Zúricher múntz genger vnd genemer richten vnd weren sol, als er si vor vmb die pfrůnd geben hatt, vnd sol im die gentzlich bezaln vff sant Vrbans tag den nechsten, so nv kunt nach dem tag hin, als dirre brief geben vnd dise richtunng beschehen ist, der selben drissig pfund pfenning Eberhart Wu^est von dem vorgenanten abte vnd von sinem gotzhus ze Rúti gar vnd gentzlich gewert ist vnd in sinen gůten nutz komen sind nach siner vergicht, vnd darvmb so haben wir mit namen berett vnd vsgesprochen, das Eberhart der Wu^est vnd Clausen sin svn noch kein ir erben noch nieman von ir wegen noch an ir statt den vorgenanten den abte von Rúti noch daz gotzhus ze Rúti noch kein ir gůt ligentz noch varentz an keinen stetten von der vorgenanden pfrůnd wegen noch von der selben sach vnd sto^eß wegen von disem tag hin, als dirre brief geben ist, niemer mere ansprechen no^eten vftriben bekúmbern noch beswa^erren sol weder mit geistlichen noch mit weltlichen gerichten noch ane gericht noch nicht schaffen getan werden mit keinen sachen. Vnd dez vnd hier v´ber ze einem warem^b), daz dis war sie vnd stet belibe nv vnd hie nach, da von so haben wir die vorgenanten der vogt vnd der rat der stat ze Rapreswil der selben v´nser stat insigel offenlich gehenkt ane disen brief v´ns vnd v´nser stat nachkomen vnschedlich. Dirre brief ist geben an dem nechsten zinstag tag^c) nach mittervasten in dem iar, do man zalt von gottez gebúrt drúzehenhundert vnd achtzig jar vnd dar nach in dem vierden jare.

Source Fulltext: Chartularium Sangallense X, Nr. 6006, S. 182-183.