Allen^a) den, die disen brieff ansehent lesent oder ho^erent lesen, kúnden wir dis nâchgenemten Johans Sto^ekli statamman ze Veltkilch¹ || vnd Johans von Hofen lantamman ze Rankwil² vnd veriehen offenlich an disem brieff, won die fúrsichtigen wîsen der burger||maister vnd der rât gemainlich der stat ze sant Gallen den erberen lúten Ja^ek Behaims sa^elgen kinden von Schnúfis³ v´nsers || gna^edigen herren graf Růdolffs von Montfort⁴ lúten das erb vnd êrbschafft ligendes vnd varendes gůtes, als Růdolff Behain sa^elig iro brůder wilunt burger ze sant Gallen gelassen hât, hant lâssen gelangot vnd ervolget, darvmb so haben wir den selben dem burgermaister vnd dem rât gemainlich der stat ze sant Gallen gelopt baide vnuerschaidenlich bi gůten trúwen vnd lobent vnd bindent v´ns des mit disem gegenwúrtigen brieff also, bescha^ech das ieman, wer oder welhi die wa^erint, fro^vw oder man pfaff oder laye gaistlich oder weltlich, wie si genant wa^erint, die selben den burgermaister vnd den rât gemainlich der selben stat ze sant Gallen ald ir nâchkomen oder dehainen burger ald burgerinen von sant Gallen besunder von des selben erbes ald erbschaft wegen ligendes ald varendes gůtes, so der obgenant Růdolff Behain sa^elig gelassen hât, iemer anspra^echint v^fftribint oder bekúmbertint, es wa^er vff gaistlichen oder vff weltlichen gerihten, es wa^er von v´bernútzze oder von dehainerlay ander sache wegen ald mit dehainerlay ander ansprache, wenne wâ oder wie dik das bescha^ech, das wir sú darvmb allweg verstân versprechen vnd vertretten vnd inen die selben ansprachen gantzlich vnd gar ablegen vnd abtriben so^ellin vnd wellent âne allen iren schaden âne allen fúrzug vnd widerrede luterlich vnd âne alle geua^erde. Vnd wa^er, das wir das niht ta^etint oder daran sv´mig wurdint, wie si dann des ze schaden koment in dehainen weg, den schaden so^ellint vnd wellent wir den selben dem burgermaister dem rât vnd den burgern gemainlich von sant Gallen vnd ir ieklichem besunder vnd iren nâchkomen gantzlich ablegen vnd abtůn âne allen fúrzug vnd widerrede bi den trúwen, als wir gelopt habent. Wir haben o^vch den selben burgern von sant Gallen gemainlich vnd ir ieklichem besunder vollen vnd gantzen gewalt geben vnd fries vrlob vnd gebent in mit disem brieff, das si vnd wer in des helffen wil v´ns darvmb angriffen pfenden vnd no^eten sont vnd mugent an allen v´nsern lúten vnd gu^etern in stetten in do^erffern vnd vff dem lande mit gaistlichen vnd mit weltlichen gerihten vnd âne alles reht ân klag vnd ân allen zorn, wie vnd wâ oder wâhin si das getůn mugent oder went, in stett vff búrg oder wâhin si went, als vil vnd als dik, vntz das in ie ir schad, in den si ie dann von des vorgedâhten v^fftribens vnd ansprâchen wegen koment ald komen sint, gantzlich abgelait wirt âne alle geua^erde, vnd sol v´ns noch v´nser lút noch gu^eter davor noch dawider niht schirmen noch gůt sin enkain frihait noch gewonhait enkain buntnust der herren noch der stette enkain burgreht stettreht lantgriht noch enkain gaistlichs noch weltlichs gerihtes noch enkainerlay ander sache noch fúrzug. Vnd des alles ze offemm wâren vrkúnde so haben wir die obgenanten Johans Sto^ekli statamman vnd Johans von Hofen lantamman, als vorgeschriben stât, v´nsrú insigel offenlich gehenkt an disen brieff. Der ist geben ze sant Gallen an dem na^ehsten ma^entag vor sant Hylarius tag des hailgen byschoffs in dem iâre, do man von Cristus gebúrt zalte drúzehenhundert jâre vnd darnach in dem vier vnd ahtzigosten jâre.

Source Fulltext: Chartularium Sangallense X, Nr. 5992, S. 164-165.