Wir^a) die von Regenspurg vnd die von Basel frye stette vnd ouch wir des heilgen Ro^emschen riches stette Ougspurg, Nu^erenberg, Vlme^b), Costentz, Esselingen¹, Rútlingen², Rotwil³, V´berlingen⁴, Memmingen⁵, || Bybrach⁶, Rauenspurg⁷, Lindo^vw⁸, sant Gallen, Phulwendorf⁹, Kempten¹⁰, Koufbrunnen¹¹, Lútbach^c)12, Isni¹³, Wangen¹⁴, No^erdlingen¹⁵, Rotenburg vff der Tuber¹⁶, Dinkelsbúhel¹⁷, Wintzhein¹⁸, Wissenburg¹⁹, Halle²⁰ || Halprunnen²¹, Gemúnde²², Winphen²³, Winsperg²⁴, Gyengen²⁵, Alon²⁶, Bopphingen²⁷, Wil in Thurgo^ew²⁸, Bůchorn²⁹ vnd Bůcho^vw³⁰ etc., die den bund mit enander haltent in Swaben, bekennent v´ns offen||lichen mit disem briefe vnd tůnd kunt menglichem, die in sehent lesent oder ho^erent lesen, als die fúrsichtigen vnd wisen v´nser lieben getrvwen herr V^olrich Gutterolff ritter burgermeister der rate vnd die burgere gemeinlichen riche vnd arme des heilgen richs stat ze Múlhusen³¹ in Baseler bystůme gelegen zů v´ns in v´nsern punt mit gůter zitlicher vorbetrachtung vmbe so^eliche sache, so in v´nserm buntbrief begriffen vnd geschriben ist, kommen sint vnd den mit v´ns gesworn hant ze haltende ze leistende vnd ze vollefu^erende nach vnsers buntbriefs lute vnd sage vnd ze glicher wise vnd in allen dem rechten vnd mit allen artigklen vnd puncten, als ouch wir den gemachet vnd verschriben habent vnd der buntbrief bewiset, das wir dar vmbe mit gůtem willen vnd wolbedachtem sinne vnd můt, wand si och die sint, die zů dem heilgen riche geho^erent, den selben burgermeister rate vnd burgere der stat Múlhusen gemeinlichen vnd besunder richen vnd armen habent ietzant glopt verheissen vnd versprochen globent versprechent vnd verheissent bi gůter trvwe vnd mit kraft dis briefes vnd vff vnd bi den eyden, so wir in v´nserm bund gesworn vnd getan habent liplichen zen heilgen, inen getrvwelichen ze helffende vnd ze ratende vnd beholffen vnd beraten ze sinde vnuerbrochenlichen nach v´nsers buntbriefs lute vnd sage vnd ze glicher wise vnd mit allem dem rechten, als ob si den selben bund mit v´ns angefangen vnd gemacht hettent vnd als ob si mit nemlichen worten bi v´ns in dem selben v´nserm buntbriefe begriffen vnd geschriben werent, ane alle geuerde. Mit vrkúnd dis briefs, den wir in mit der vier stetten Basel, Vlme, Costentz vnd Rauenspurg gemeinen eygenen vnd anhangenden ingesigelen darvmbe besigelt geben, die selben stette ouch das von vnser aller geheisses wegen getan vnd ire ingesigele offenlich an disen brief von v´nser vnd ir selbs wegen gehenket hant, des ouch wir die selben vier stette v´ns bekennent mit disem briefe. Der geben ist in dem iare, da man zalte von gottes gebúrte drútzehen hundert achtzig vnd fúnf jare, an dem nechsten samstag nach dem heilgen ostertag.

Source Fulltext: Chartularium Sangallense X, Nr. 6068, S. 248-249.