Wir^a) graf Donat vnd graf Diethelm von Tokkenburg¹ gebrůder grafen ze Brettengo^e2 || vnd ze Thafaus³ tůnd kund mit disem brief allen den, die in an sehent lesent || oder ho^errent lesen, als der erwirdig herr byschof Johans des bystums ze Cur⁴ || besta^et hat die frůgen mess vnd pfrůnd ze dem vordren altar in vnser stat ze Mayenueld⁵ gelegen in dem vorgenanden bystům ze Cur, die selben pfrůnd vnd altar wir vnd vnser erbun lihen sond, das er da im selber sinen nachkomen vnd dem gotzhus iro frihait vnd reht behalten hat vngeuarlich als zů andern pfrůnden vnd altarn, die in dem bystum gelegen sint. Vnd des ze vrkúnd hant wir graf Donat vnd graf Dyethelm von Tokkenburg da vorgenant vnsrú insigel offenlich gehenket an disen brief. Der geben ist in vnser vorgenanden statt ze Mayenueld an dem na^echsten zinstag nach sant Vrbans tag, der der drissigost tag was des manotz des mayen, in dem iar, do man zalt von Cristus gebúrt drúzehenhundert iar, ahtzig iar vnd dar nach in dem fúnften iare.

Source Fulltext: Chartularium Sangallense X, Nr. 6078, S. 255.