Ich^a) Hainrich Schaffer ze den ziten amman ze Rumashorn¹ des edeln mins gna^edigen herren abt Cůn des gotzhus ze sant Gallen² || tůn kunt vnd vergich offenlich an disem brief allen den, die in ansehent lesent oder ho^erent lesen, von der misshellung vnd sto^ess, || so herr Eglolf von Landenberg³ ritter ze ainem tail gehebt haut mit des vorgenanten mins gna^edigen herren von sant Gallen || armen lúten, die in den hof ze Kesswile⁴ geho^erent, ze dem andern tail, von des getretz wegen des holtz, daz man nempt daz Kaister⁵, daz gelegen ist zwischent dem Mosholtz⁶ vnd dem dorf Kesswile bi dem Se⁷. Der selben misshellung vnd sto^ess si baidunthalb vff mich den egenanten Hainrich Schaffer kumen sind vnd genonen^b) hand ze ainem gemainen man zů den minnen vnd ze dem^c) rehten. Von der vorgenanten misshellung vnd sto^ess wegen kam fúr mich gen Kesswile der obgenant herr Eglolf von Landenberg ritter an sant Hylarien tag na^vch der dat, als dirre brief geben ist, ze ainem tail vnd Hans Cu^entzeller, V^olrich Regelli, V^olrich Mutz, Ru^edi Wirtz, Berschi Wirtz, Růf Kittel vnd Ru^edi Túmbach vnd alle die lút, die in den vorgenanten hof ze Kesswile gehortend, zů dem andern tail, vnd han vor baiden tailn mit wolbeda^vchter vorbetrachtung vssgesprochen von der vorgenanten misshellung vnd sto^ess wegen mit so^elicher gedinge, daz die ietzgenempten mins gna^edingen herren von sant Gallen armen lút, die in den obgenanten hof ze Kesswile ho^erent, oder ander lút, die noch sond oder werdent kumen in den selben hof gen Kesswile, den vorgenanten herr Eglolf von Landenberg ritter noch sin erben si noch ir na^vchkumen nit irren noch sumen noch bekrenken sond enkains wegs an dem obgenanten holtz getrêtt vnd waid, daz gen Gúttingen⁸ zů der burg, die man nempt die Mosburg⁹, geho^ert. Vnd ze merer sicherhait aller vorgeschriben dinge han ich obgenanter Hainrich Schaffer min aigen insigel gehenkt an disen brief. Der geben ist ze Rumasshorn in dem jar, do man zalt von Cristus gebúrt drúzehenhundert ia^vr, achtzig iar, da^vr nach in dem sechten^b) ia^vr, an sant Hylarien tag.

Source Fulltext: Chartularium Sangallense X, Nr. 6123, S. 314-315.