Allen, die disen brieff ansehend oder ho^erent lesen, kúnd ich Johans Ko^echler burger ze sant Gallen vnd vergich offenlich an disem brieff fúr mich vnd min erben, dz ich mit gůter vorbetrachtung dz gůt ze Búrwalt¹, dz wilent Wernlis seligen von Búrwalt was, die zeig in dem Stalden², die zelg am Rechhag³ vnd die zelg am Júch⁴, die zů dem selben gůt geho^erent, die min lehen sind von dem gotzhus ze sant Gallen, vnd den hoff ze Ihselberg⁵, stosset einent an das vorgenant gůt ze Búrwalt vnd andrent an Niderwil⁶, ze der dritten siten an Spitzenrúti⁷, das min fryes eigen ist, mit hus, mit hoff mit akern mit wisen mit wasen mit zwy mit holtz mit veld mit allen rechten nútzen vnd gewonheiten vnd mit aller zůgehord recht vnd redlich verlihen han vnd lieh si mit disem brieff dem wolbescheiden V^olr. Buman von Búrwalt vnd allen sinen erben frowen vnd mannen tochtran vnd knaben ze einem rechten sta^eten erbzinslehen vmb einen sta^eten zins mit der bescheidenheit vnd in dem rechten, dz er vnd sin erben die vorgenanten gu^eter mit aller zůgeho^erd haben vnd niessen sond, vnd sond mir vnd minen erben von den gu^etern mit aller zůgehord da von jerlich je ze sant Martis tag vier malter beider gůtes vngeuarliches kornes Bischoffzeller⁸ messes zechen schilling pf(enning) Cost(entzer) múntz vier herbst hu^enr vnd fúnffzig eyer geben ze rechtem jerlichem zins ân allen abgang ân fúrzug vnd ân v´nsern schaden an geuerde ze sant Gallen in der statt. Es ist ouch mit namen berett worden, dz ich vnd min erben fryes vrlob vnd vollen gewalt haben sond, vff den vorgenanten gu^etern beiden wenn wir wellen allerley holtz ze howen vnd dannen fu^eren, das ze reiffen gůt ist, vnd sond si v´ns das nit wu^esten noch abhowen denn mit v´nserm willen, ân geuerd. Es ist ouch berett, beschech, dz ich ald min erben deheines jares von den rechten der vorgenanten gu^etern gan vnd die verkouffen woltind, dz wir denn die vorgenanten v´nsri recht dem vorgenanten V^olr. Buman oder sinen erben des ersten veil bieten vnd vor menklichem ze kouffen geben sond fúnff schilling pf(enning) Cost(entzer) neher denn andern lúten, ob si kouffen wend. Wer aber, dz si nit kouffen wo^eltind, so mugen wir dannenhin v´nsri recht wol ze kouffen geben, wem wir wellen, im vnd sinen erben an iren rechten vnschedlich. Vnd ze vrkúnd so han ich Johans Ko^echler da vorgenant fúr mich vnd min erben min insigel gehenkt an disen brieff. Der geben ist an mentag nach Hylarii nach gotz gebúrt drúzehenhundert vnd achtzig jar, dar nach im sechsten jare.

Source Fulltext: Chartularium Sangallense X, Nr. 6124, S. 315-316.