Allen^a) den, die disen brief ansehent lesent oder ho^erent lesen, kúnd ich Cůnrat Brunnman¹ ampt||man der wolerbornen miner gna^edigen herschaft von Tokkenburg, daz fúr mich kam ze Liehtenstaig² || in der statt, da ich an derselben miner herschaft statt offenlich ze geriht sazz hút dis tags, alz diser || brief geben ist, der erber kneht Růdolf Stendler von Waldenwile³ vnd ofnot mit sinem fúrsprechen vnd sprach, daz er mit gůter vor betrahtung fúr sich vnd fúr alle sin erben redlich vnd recht verkoft hetti allú dú gu^eter halbi, die gelegen wa^erent vf der Egg⁴ in Magelsperger⁵ kilchspel, die Ru^edi sa^elig ab der Egg vntz an sinen tod inne gehebt hetti vnd die er koft hetti von Ru^edin ab der Egg sinem elichen sun, mit hus mit hof mit hofraiti mit hofstetten mit spichern mit st^edeln mit akkern mit wisan mit holtz mit veld mit wunn mit waid mit allen rechten nútzen zinsen gewonhaiten vnd mit aller zůgeho^erd, vnd hetti ze koffent geben dem erbern man Hainrichen Kessler von Tannegg⁶ vnd allen sinen erben vmb aht pfund pfen(ning) gůter vnd gena^emer Costentzer múns, dero er och gantzlich von im gewert vnd bezalt wa^eri an den stetten, da er sinen fromen mit geschaffot hetti, vnd wa^eri der kof beschehen vnd volfu^ert mit den gedingden, daz der obgenant Ru^edi ab Egg ald sin erben dieselben gu^eter mit allen obgenanten rechten vnd zůgeho^erden wider von dem ietzgenanten Hainrichen Kessler ald von sinen erben wider koffen vnd an sich lo^esen mugent nach dem na^ehsten sant Vrbans tag, der nu schierost kumt nach dem tag, alz diser brief geben ist, dar nach inwendig den na^ehsten drin iaren, die schierost nach ainander koment, welhes iares vnder den drin iaren sy wend, vor sant Johans tag des Toffers ze sunnwendi. Bescha^ech aber der widerkof der selben drú iar dehaines nach dem ietzgenanten sant Johans tag, so sol der nutz desselben iares dem vorgenanten Hainrichen Kessler ald sinen erben doch volgen vnd gantzlich werden, bescha^ech aber der widerkof nit mit aht pfund pfen(ning) der obgenanten múns inwendig den vorgenanten drin iaren, so sol es dannan hin^b) eweklich ain besta^eter vnwiderru^efklicher kof sin a^vn alle geua^erd. Vnd nach der offnung vnd vergicht verzech sich do zestett der vorgenant Růdolf Stendler ledklich frilich vnd wolbedahtklich gen dem vorgenanten Hainr(ich)en Kessler vnd gen allen sinen erben mit siner hand mit gelerten worten an des gerichtes stab, alz recht sitt vnd gewonlich was vnd alz nach miner frag mit gemainer vrtail ertailt wart, vnd verziht sich och redlich vnd recht mit disem brief fúr sich vnd fúr alle sin erben der vorgenanten halben gu^eter mit allen vorgeschribnen rechten vnd zůgeho^erden vnd darzů aller aigenschaft aller gewer aller kuntschaft aller rechtung aller vordrung vnd ansprach, so er ald sin vordem ald sin erben dar zů ie gehatten in dehain wis ald weg ald von dehainerlai sach weg a^vn geva^erd, doch dem obgenanten Ru^edin ab Egg vnd sinen erben an dem widerkof, alz vor beschaiden ist, vnscha^edlich. Vnd lobt och do der obgenant Růdolf Stendler vesteklich fúr sich vnd fúr alle sin erben mit gelerten worten an des gerichtes stab, der obgenanten halben gu^eter vnd dis kofs in aller wis, alz vor geschriben stat, des vorgenanten^c) Hainrich Kesslers vnd aller siner erben allenthalben gen allermenglichem, wenn si des bedurfent, recht wem ze sint nach aigens reht vnd nach des landes sitten vnd gewonhait a^vn geva^erd. Vnd des alles ze offner zúgnu'st der warhait so gib ich obgenanter richter dem vorgenanten Hainrichen Kessler von siner vordrung wegen disen brief von des gerichtes wegen mit minem insigel versigelt. Der geben ist mit rechter vrtail an aller glo^ebigen selen tag, do man zalt von Cristus gebúrt drúzehenhundert vnd ahtzig iar, dar nach in dem sehsten jar.

Source Fulltext: Chartularium Sangallense X, Nr. 6156, S. 350-351.