Wir^a) Wenclaw von gotes genaden Romischer kunig zu allen czeiten merer des reichs vnd kunig zu Beheim be||kennen vnd tun kunt offenlichen mit disem briue allen den, die in sehen oder horen lesen, das wir vnsern lieben getrewn || den steten Regensburg vnd Basel czwu frey stete vnd ouch vnsern vnd des heiligen Romischen reichs steten mit || namen Auchsburg, Nuremberg, Costnicz, Vlme, Esslingen³, Rewtlingen⁴, Rotwil⁵, Weil⁶, Vberlingen⁷, Memingen⁸, Bybrach⁹, Rauensburg¹⁰, Lyndaw¹¹, sant Gallen, Kempten¹², Kawfburn¹³, Lutkirch¹⁴, Ysny¹⁵, Wangen¹⁶, Pfullendorf¹⁷, Buchorn¹⁸, Nordlingen¹⁹, Dinkelspuhel²⁰, Rotenburg vff der Tuber²¹, Poppfingen²², Awln²³, Gemunde²⁴, Halle²⁵, Heilbrun²⁶, Wimppfen²⁷, Weinsberg²⁸, Windsheim²⁹, Weissenburg³⁰, Gingen³¹, Buchaw³², Sweinfurt³³ in Franken vnd Mulhawsen³⁴ in Elsassen die genade getan haben, das sie beleiben sullen bey allen iren rechten freyheiten priuilegien vnd bey iren guten gewonheiten, die sie haben von vns oder von andern keysern vnd kunigen vnsern voruarn an dem heiligen reich vnd als sie die bis her bracht haben bis vff disen hewtigen tag, vnd wollen ouch die vorgenanten stete miteinander bey vns vnd bey dem reich behalten, vnd wer der were, der die vorgenanten stete doran irren dringen besweren oder krenken weit, dorzu wollen wir sie beschuczen vnd schirmen vnd in getrewlichen geraten vnd beholffen sein vnd nicht wider sie sein onguerde. Mit urkunt dicz briues versigelt mit vnserm kuniglichen maiestat insigel. Geben zu Nuremberg noch Crists geburte dreiczehenhundert jar vnd dornach in dem sibenvndachczigistem jare, des mitwochen noch dem suntag, als man singet Letare in der vasten, vnserr reiche des Behemischen in dem virvndczweinczigisten vnd des Romischen in dem eynlefften jaren.

Source Fulltext: Chartularium Sangallense X, Nr. 6174, S. 374.