Wir^a) dis nachgeschribnen Eberhart vnd Albreht von Búrglen¹ gebrůder baid ritter veriehen vnd tůnt kunt allermeng||lichem mit disem brief, daz wir baid gemainlich vnd vnuerschaidenlich fúr v´ns vnd fúr alle v´nser erben von v´nser || kumberhaftin wegen ledklich vnd frilich vnd och redlich vnd recht verkoft haben den zehenden ze A^erwile² dem hof || bi Wulfikon³ gelegen mit allen rechten nútzen zinsen gewonhaiten vnd mit aller zůgeho^erd, der von v´ns lehen was, vnd haben denselben zehenden mit aller zůgeho^erd fúr v´ns vnd fúr alle v´nser erben gefriet vnd geaigent vnd fúr recht ledig frie aigen zekoffent geben dem fromen man Eberlin vndern Bomen burger ze Liehtenstaig⁴ vnd allen sinen erben vmb drissig pfund gůter vnd gena^emer Italiger haller, dero wir och gantzlich vnd gar von im bezalt sint an den stetten, da wir v´nsern gemainen nutz vnd fromen mit geschaffot haben, vnd haben im och denselben zehenden mit allen rechten nútzen gewonhaiten vnd mit aller zůgeho^erd fúr v´ns vnd fúr alle v´nser erben ledklich vnd frilich vffgeben vnd fúr recht aigen zů sinen vnd zů siner erben handen vnd gewalt braht vnd gevertgot, alz recht sitt vnd gewonlich was vnd alz es billich vnd von recht kraft ha^vt vnd haben sol nu vnd hernach, vnd haben hier v´ber fúr v´ns vnd fúr alle v´nser erben vnd nachkomen gegen dem vorgen(anten) Eberlin vndern Bomen vnd gegen allen sinen erben an dem vorgen(anten) zehenden verzigen vnd entwert vnd verzihen v´ns ledklich frilich wissentklich vnd wolbedahtklich mit disem brief aller manschaft aller lehenschaft aller aigenschaft aller gewer aller kuntschaft aller zúgnúst lút vnd brief alles rechtes gaistlichs vnd weltlichs gerichts aller rechtung aller frihait vnd gnaden, so wir von kaisern von kúngen ald von andren fúrsten ietzo ha^vnt ald hernach iemer gewinnen mo^ehten, vnd dar zů aller vordrung vnd ansprach, so wir ald v´nser vordern ald v´nser erben ald ieman andra von v´nsren wegen zů dem vorgen(anten) zehenden mit aller zůgeho^erd ie gehatten ald hernach in dehain wis ald weg iemermer gewinnen mo^ehten von recht ald von gewonhait ald von hainerlay^b) andren sach wegen, so ieman erdenken kan ald mag, a^vn geva^erd. Wir haben och gelobt vnd loben vesteklich mit disem brief fúr v´ns vnd fúr alle v´nser erben, des vorgen(anten) zehenden fúr recht aigen vnd dis kofs in aller wis, alz vorgeschriben sta^vt, gen allermenglichem recht wern zesint nach aigens recht vnd nach des landes sitten vnd gewonhait, wenn ald wa sin der vorgen(ant) Eberli vndern Bomen ald sin erben noturftig sint ald mit dem rechten dar vmb angesprochen ald vf getriben werdent, a^vn geva^erd. Vnd des alles ze offem vrkúnd der warhait so haben wir obgen(anten) Eberhart vnd Albreht von Búrglon v´nsrú insigel fúr v´ns vnd fúr alle v´nser erben offenlich gehenkt an disen brief. Der geben ist an v´nser lieben frowen aubent ze der liehtmizz, do man zalt von Cristus gebúrt drúzehenhundert vnd ahtzig iar, dar nach in dem sibenden jar.

Source Fulltext: Chartularium Sangallense X, Nr. 6163, S. 361-362.