Wir^a) gra^vf Tonat vnd gra^vf Fridrich sin vetter von Tokkenburg herren ze Brettengo^e1 vnd ze Tafas² veriehen || vnd tůnt kunt aller menglichem mit disem brief fúr v´ns vnd fúr alle v´nser erben, daz wir baid gemainlich || vnd vnuerschaidenlich wissentklich vnd wolbedahtklich fúr v´ns vnd fúr alle v´nser erben ledklich vnd frilich || ze ainem rechten redlichen wehsel geben ha^vnt vnd gent och wissentklich mit disem brief die ersamen frowen Margrethen Fritschis sa^elgen ab der Hůb elich tohter Búrgis Waibels vsser Diesselbach elich wirtenn mit lib vnd mit gůt vnd mit allen rechten diensten nútzen vnd mit aller zůgeho^erd den erberen gaistlichen frowen in got frow Vrsullen von gottes verhengnúst a^ebtissenn vnd dem couent gemainlich des gotzhus ze Magnow des Ordens von Ziteln in Costentzer bistum vnd allen iren nachkomen zů desselben gotzhus handen vnd gewalt, also daz dieselb Margretha Fritschis, die vntz har v´nser recht aigen was, vnd alle irú kint, so von ir iemer geboren sint ald werdent, von aigenschaft ir libes nu hinnan hin iemer mer geho^eren sont an daz obgen(ant) gotzhus ze Magnow, wan wir och dieselben frowen mit aller zůgeho^erd vffgeben vnd zů desselben gotzhus handen gevertgot vnd braht haben, alz recht sitt vnd gewonlich was vnd alz es billich kraft ha^vt nu vnd hernach. Dar vmb so ha^vnt si v´ns vnd v´nsren erben in rechtes geliches wehsels wise geben die erbern frowen Katherinen Waiblinen Hansen Kolben von Ganderswile elichen wirtenn mit lib vnd mit gůt vnd mit allen rechten nútzen vnd zůgeho^erden, die mit aigenschaft ir libes vormals vntz her an daz obgenant gotzhus ze Maggnow gehort, vnd ha^vnt v´ns die och zů vnsern handen vffgeben vnd geuertgot, alz dis alles der brief³ volkomenlicher wiset, den wir von inan dar vmb inne ha^vnt. Vnd wan wir disen wehsel also redlich geta^vn haben, so verzihen vnd entweren wir v´ns mit kraft dis briefs fúr v´ns vnd fúr alle v´nser erben gegen der obgen(anten) a^ebtissennen vnd gemainem couent vnd gegen allen iren nachkomen vnd och gegen dem obgen(anten) gotzhus ze Maggnow aller aigenschaft aller lehenschaft aller manschaft aller gewer aller besatzung aller kuntschaft vnd zúgnúst lút vnd brief aller rechtung alles rechten gaistlichs vnd weltliches gerichtes aller vordrung vnd ansprach, so wir ald v´nser erben ald ieman andra von v´nser wegen zů der obgen(anten) Margrethen Fritschis mit lib vnd mit gůt vnd mit aller zůgeho^erd ie gehatten ald hernach in dehain wis ald weg iemer mer gewinnen mo^ehten von dehainerlai sach wegen, so ieman erdenken kan, a^vn geva^erd. Wir haben och gelobt vnd loben vesteklich mit disem brief fúr v´ns vnd fúr alle v´nser erben, der obgen(anten) Margrethen fúr recht aigen vnd dis wehsels gen allermenglichem recht wem zesint nach dem rechten vnd nach des landes sitten vnd gewonhait, wenn ald wa sin die obgen(anten) a^ebtissenn vnd der couent ald ir nachkomen ald die obgen(ant) Margretha Fritschis noturftig sint ald mit dem rechten dar vmb vffgetriben werdent vngeuarlich. Vnd des alles ze offem vrkúnd der warhait so haben wir gra^vf Tonat vnd graf Fridrich da obgen(ant) v´nsrú insigel offenlich gehenkt an disen brief. Der geben ist an sant Agthen tag, do man zalt von Cristus gebúrt drúzehenhundert vnd ahtzig iar, dar nach in dem sibenden jar.

Source Fulltext: Chartularium Sangallense X, Nr. 6165, S. 363-364.