Wir^a) die stette Regenspurg vnd Basel fry^e stette vnd ouch wir dez hailigen Ro^emischen richs stette Augspurg, Nu^erenberg, Costentz, Vlme, Esslingen¹, Rútlingen², Rotwile³, Wile⁴, || V´berlingen⁵, Memingen⁶, Bibrach⁷, Ravenspurg⁸, Lyndow⁹, santt Gallen, Pfullendorff¹⁰, Kempten¹¹, Kouffbúrren¹², Liv´tkirch¹³, Ysni¹⁴, Wangen¹⁵, No^erdelingen¹⁶, Rotenburg vff der Tuber¹⁷, Dinkelspúhel^b-)18, Swinfurt¹⁹, || Wintzhain²⁰, Wissenburg²¹, Halle²², Hailprunnen²³, Gemúnd²⁴, Winpffen²⁵, Winsperg²⁶, Aulun²⁷, Giengen²⁸, Bopfingen²⁹, Bůchorn³⁰, Múlnhusen³¹ vnd Bůchowe^-b)32 bekennen offenlich mit disem brieff, wan wir den || hochwirdigen fúrsten vnd herren hern Bylgrin von gottes gnaden ertzbyschoff zu Saltzburg³³ des hailigen stůls zu Rome legate vnsern lieben gnedigen herren so redlichen vnd gerechten an dem hailigen rich vnd an vns erfunden haben, vnd wan ouch er in allen sachen als gelich fridlich weg fúrhand nimet, darvmb vnd wan ouch wir mit allen dingen vff fride ouch genaigt sien, so haben wir vns ietzo mit gůtem willen vnd mit wolbedachtem sinne vnd můt got zu lob dem hailigen Ro^emischen rich zu eren vns selb vnd gemainem lande zu fride vnd zu gemach mit vns selb vnd ouch mit allen vnsern stetten schlossen lúten vnd ouch gůten zů dem vorgenanten vnserm gnedigen herren hern Bilgrin ertzbischoff zu Saltzburg vnd zů allen sinen schlossen stetten landen lúten vnd ouch gůten ietzo willeklich vnd gern verstrikt vnd verbunden verstriken vnd verpinden ouch vns dez zů im mit rechter wissent vnd mit krafft dis brieffs mit vnsern gůten truwen hinnan bis uff santt Michels tag, der aller schierost komet, vnd darnach fúnff gantziv jare div nechsten nach ainander ze zellent. Also wa^er es, daz iemant, wer der wa^er, den vorgenanten vnsern herren von Saltzburg oder die sinen, die im zu versprechen stand, in der vorgeschriben zit vnd jaren angriff oder beschedigete an ym selb oder an sinen landen lúten oder gu^eterr oder wie ald in welich wise das bescha^ech, also das sich der vorgenant vnser herre von Saltzburg vnd mit im vier sins ratz uff ir aide vnd ere bekanten, daz ym oder den sinen vnrecht beschehe oder beschehen wa^ere vnd daz man in daz nit widerkeren wo^elt, wenne denne wir vorgenanten stette gemainlich oder aines oder mer vnder vns besunder von dem vorgenanten vnserm herren von Saltzburg selb oder von siner gewissen bottschafft oder brieffen darvmbe ermant werden, so súllent wir ym denne gemainlich vnd jeglichiv statt vnder vns besunder getrúlich beraten vnd beholffen sin bi vnsern gůten truwen, also daz wir nauch der selben siner ermanung in ainem manod dem nechsten die oder den selben, die im den angriffe oder schaden also ta^eten oder getan hetten, vnd ouch alle ir helffer vnuerzogenlich vnd ouch ane alle geverde angriffen vnd beschedigen súllent an lib vnd an gůt ze gelicher wise vnd in allem dem rechten, als ob vns daz selb widerfaren vnd beschehen wa^ere, als lang vnd ouch vntz uff die zite, bis daz im oder den sinen so^elicher schade abgeleit vnd widerkert vnd div sach gentzlich erobert wirt, ane alle geverde. Vnd wenne daz wa^ere, das so^elich angriff zu richtung oder zu fride ka^emen oder braucht wúrden, so sol sich doch der vorgenant vnser herre von Saltzburg darinne besunder nicht versu^enen friden noch verrichten in dehain wise, es sy denne, daz er vns mit im in der selben sůne fride oder richtunge ouch begriffe gelich im selb ane alle geverde. Doch so nement wir vorgenanten stette in diser ainung vnd verbuntnús vss den aller durhlúchtigosten fúrsten vnd herren hern Wentzlaw von gottes gnaden Ro^emischen kúnig zů allen ziten merrer dez richs vnd kúnig zů Beheim vnsern lieben gnedigen herren, darzů nemen wir vsz die verainung, die wir haben mit vnsern aidgenossen den Rinischen stetten vnd ouch den Waltstetten³⁴, ouch nemen wir vsz die herrschafft von O^esterrich vnd die ainvng, die wir haben mit den fúrsten vnd herren, div ze Haidelberg gemachd wart, alz lang die selb ainung werot, vnd súllent ouch fúrbaz mit den selben fúrsten vnd herren kain ainvng machen, wir nemen denne dis verbuntnús, die wir gen dem vorgenanten vnserm herren von Saltzburg gemachd haben, darinne gentzlich vsz, es wa^ere denne, daz der selb vnser herre von Saltzburg mit vns in die selben ainvng komen wo^elt, doch sol dis vsnemen also beschaidenlich beliben vnd bestan, wa^er es, daz wir iemant, den wir in diser ainvng vsgenomen haben, wider den vorgenanten vnsern herren von Saltzburg mu^esten oder wo^elten beholffen sin, daz dennocht alle sin koufflúte lút vnd ouch gůt in allen vnsern stetten schlössen vnd gebieten gentzlich sicher vnd fry sin súllent ane alle geverde. Vnd also geloben wir vorgenanten stette all mit vnsern gůten truwen, all vorgeschriben sach stuk púnde vnd artikel war sta^et vnd vest zu halten ze laisten vnd ouch ze vollefu^eren ane alle geverde nauch dis brieffs sag. Vnd dez allez ze warem vnd offem vrkúnd geben wir vorgenanten stett alle dem egenanten vnserm herren von Saltzburg disen brieff besigelten mit vnser der vorgenanten von Regenspurg, von Augspurg, von Nu^erenberg, von Vlme, von Esslingen vnd von Rauenspurg aignen insigeln, die selben sechs stette ouch das von vnser aller haissentz vnd gebotz wegen getan vnd ir stett insigel an disen brieff gehenkt hant. Der geben ist an santt Jacobs tag dez hailigen zwelffbotten, do man zalt von Cristz gebúrt drivzehenhundert iar vnd darnauch in dem siben vnd achtzigostem jare.

Source Fulltext: Chartularium Sangallense X, Nr. 6196, S. 397-398.