Allen^a) den, die disen brief sehent lesent oder ho^erent lesen, kúnd ich Hanman Schnider von Ermatingen¹ vnd vergich offenlich mit disem brieue, daz || fúr mich kament an dem tag, alz dirre brief geben ist, do ich an stat vnd in namen mines junkherren Růdolfs dez Hartzzers vnd von sines haissens wegen || ze Ermatingen an offener strasse offenlich ze geriht saz, die erber wolbeschaiden junkfro^vw Amelya Otten sa^elgen am Hard² elichi tohter vnd offenot || mit fúrsprechen offenlich vor mir an gemainem geriht vnd sprach, si wo^elti den nachgenemten iren gůten frúnden Wetzzeln von Hegi³, Cůnraten von Eppenberg⁴ vnd Hugen von Ober Rieder⁵ fu^egen vnd machen ze ainem rehten gema^echt vnd in rehtes gema^echtes wise den akker genant der Guggenbúhel⁶ vnd ainen akker darunder gelegen ze Ermatingen, die ir reht aigen wa^erint, mit allen rehten vnd mit aller zv^o geho^erde, vnd bat mich eruarn an ainer vrtail, wie si daz tůn so^elt vnd mo^eht, alz reht wa^er vnd daz ez kraft hett vnd haben mo^eht nv vnd o^vch hie nâch. Daz tet ich vnd ward ertailt mit gemainer vrtail, daz si daz geriht in diser sache beuogten so^elt mit dez obgenanten Cůnratz von Eppenberg willen, won si daz gema^echt o^vch gen im tůn wo^elt vnd aber er von sippe wegen ir vogt ist, vnd daz danne darnach aber beschehen so^elt, daz reht wa^er. Do ward ir ze vogt geben v´ber diz sache mit dez vorgenanten Cůnratz von Eppenberg gůten willen vnd gunst der beschaiden Herman Gra^emlich ze disen ziten sesshaft ze Sandegg⁷, darnach ward aber nach miner frag ertailt mit gemainer vrtail, daz si der selb ir vogt Herman Gra^emlich ze drin malen vsser dez gerihtes ring fu^eren so^elt vnd si fragen ze ieklichem male, ob si ez willeklich vnd gern ta^et vnd tůn wo^elt, vnd daz si daz danne mit ir vnd mit dez selben ir vogtes handen vnd o^vch mit dez gerihtes stab tůn so^elt vnd daz ez danne also wol kraft vnd maht hetti nach dem rehten. Do fůrt si der selb ir vogt ze drin malen vsser dez gerihtes ring vnd fragot si, alz ertailt waz, ob si ez willeklich vnd gern ta^et vnd tůn wo^elt, der sait bi sinem aide, daz si spra^ech, daz si ez vnbezwungenlich ta^et vnd willeklich vnd gern tůn wo^elt, vnd fůgt vnd machot o^vch do ze stette die vorgenant junkfro^vw Amelya am Hard mit ir vnd mit dez vorgenanten Herman Gra^emlichs ir vogtes handen vnd o^vch mit dez gerihtes stab mit gelerten Worten, alz reht sitte vnd gewonlich waz, willeklich vnd frilich reht vnd redlich den vorgenemten Wetzzeln von Hegi, Cůnraten von Eppenberg vnd Hugen von Ober Rieder ze ainem rehten gema^echt vnd in rehtes gema^echtes wise die vorgeschribenen akker den akker genant der Guggenbúhel vnd ainen akker darunder gelegen mit allen rehten vnd mit aller zv^o geho^erde mit so^elicher beschaidenhait vnd in dem rehten, wenne die obgenant junkfro^vw Amelya am Hard erstirbet vnd enist von todes wegen, daz danne ain cappelan, der danne sitzzet vff der pfrůnd ze Ermatingen, die dv´ obgenant junkfro^vw Amelya am Hard mit irem gůt gesetzt vnd geordnot hât, die vorgeschribenen zwen akker mit allen rehten vnd mit aller zv^o geho^erde haben niessen besetzzen vnd entsetzzen sont, alle die wile die vorgenemten Wetzzel von Hegi, Cůnrat von Eppenberg vnd Hugo von Ober Rieder oder iro erben, ob sv´ enwa^erint, die vorgeschribenen zwen akker mit sechs phunden phenningen gůter Costentzzer múnse niht erlo^est noch erledgot hant, vnd doch also, daz die selben sechs phunt phenning an ain ander gůt oder ja^erlich gelt gelait werdent, da mit die selb phrůnd gebessrot werd. Vnd ist diz alles beschehen vnd vollefu^ert reht vnd redlich mit allen den worten werken vnd geta^eten, so nach gewonhait vnd nach reht darzů gehortent ald ho^eren soltent vnd notdurftig warent vnd alz ez kraft vnd maht sol vnd mag han. Vnd ze warem offem vrkúnde vnd sta^eten sicherhait aller der vorgeschribenen dinge vnd vergiht so hat der obgenant junkher Růdolf der Hartzzer von dez gerihtes wegen sin insigel gehenkt an disen brief, won ez o^vch mit gemainer vrtail ertailt ward, daz er ez tůn so^elt. Ich der obgenant Růdolf Hartzzer vergich, daz ich von dez gerihtes wegen min insigel mit vrtail gehenkt han an disen brief. Darnach veriehent wir die vorgenanten Amelya am Hard vnd Herman Gra^emlich ir vogt in der vorgeschribenen sache ainer gantzzer warhait aller der dinge, so von v´ns an disem brief da vorgeschriben stant. Vnd ze merer sicherhait der selben dinge so habent wir o^vch v´nserú insigel gehenkt an disen brief. Der geben ist ze Ermatingen, do man zalt von Cristus gebúrt drúzehenhundert jar, ahtzig jâr vnd darnach in dem sibenden jare, an dem na^ehsten ma^entag nach aller hailigen tag, da ze gegen warent diz nachgenemten erberen lút Jo^essi Schro^eter, Hainrich Ma^erki, Johans Eberli, Hainrich Albreht, der Lang Otto, V^olrich Otto, Cůnrat Otto, Hainrich Otto, Johans Vrêning vnd ander erber lút vil.

Source Fulltext: Chartularium Sangallense X, Nr. 6223, S. 431-432.