Wir^a) graf Donat vnd graf Fridreich von Toggenburg¹ geuettern bechennen offenlich mit dem brief fur vns vnd all vnser erben, daz vmb die || vest vnd stat zu Raprechtswile², die von vnsrer genêdigen herschaft von O^esterrich vnser satz ist, also zwischen dem durchluchtigen fúrsten vnserm || genêdigen lieben herren herczog Albrechten herczogen zu O^esterrich³ etc. vnd vns ist beredt vnd geteidinget vff den hutigen tag, daz derselb vnser || herr das egenant slos innehaben vnd mit einem houptmann beseczen sol. Vnd sol die stat demselben vnserm herren vnd sinen vettern vnd erben sweren, gewêrtig vnd gehorsam zu sinde in allen sachen als irer rechten herschaft vnd ouch dem houptmann alz eim houptmann, die wil der krieg wert, also doch, daz vns das an dem ayd, so si vns getan hand in phands wise, nach dem krieg vnschedlich sei an geuêr. Der egenant houptman sol ouch vns sweren, wenn der krieg also zu richtung oder langem frid zweyer jaren oder mer bracht wurt, daz er vns denn das egenant slos in den vorgeschribenen rechten also wider antwurtt. Vnd dar vff sullen im volgen alle nûtz, die zu der phantschaft geho^erent. Auch ist beredt, ob der egenant krieg angand wirt vnd vnser egenan(te) herren vnser darczů bedurffen werden, daz wir in denn darczů dienstlich vnd beholffen sin sullen vnd wellen mit allem vnserm vermúgen, also daz si vns denn darumb tůn, als si andern iren herren rittern vnd knechten tůnt, vngeuêrlich. Vnd darúber zu vrchund gib ich obgenanter graf Donat für mich vnd minen obgenanten vettern graf Fridreichen, für den ich alz sin rechter vogt mich in der sache annim, den gegenwurtigen brief versigelt mit minem anhangundem insigel. Der geben ist zu Schafhusen⁴ an suntag nach aller heiligen tag nach Krists gepurd druczehenhundert jar, darnach in dem siben vnd achczgistem jare.

Source Fulltext: Chartularium Sangallense X, Nr. 6222, S. 430-431.