Ich^a) Stephan der Mentzler burger ze Lindow¹ tůn kunt vnd vergich offenlich fúr mich vnd fúr min || erben mit disem brief allen, die in ansehent oder ho^erent lesen, daz ich mit gůter williger vorbetrachtung || vnd mit wolbedachtem sinne vnd můt ze den ziten vnd tagen, do ich ez wol getůn mocht, dem erbern || man Hansen von Arbun² och burger ze Lindow vnd sinen erben ains rechten redlichen sta^eten vngefarlichen vnd êwigen koufs ze koffent han gegeben minen hof ze Berchtramswiller³, da hút ze tag Hans Harpfer vf sitzt, mit húsern mit hofraitinen mit akkern mit wisen mit bongarten mit holtz mit veld mit wasser mit waid mit steg vnd mit weg mit zins vnd mit gelt vnd mit allen nútzen gewonhaiten vnd rechten vnd mit aller zů geho^erd gesůchtz vnd vngesůchtz fúr ledig vnd fúr los vnd han im vnd sinen erben den selben obgenanten hof mit aller zů geho^erd och geuertgot vnd mit lehenschaft in sin hant vnd gewalt brauht von dem abt vnd von dem gotzhus ze sant Gallen, dannen er lehen ist, alz vmb semlichú gůt vnd lehen gewonlich vnd recht ist ze vertgend, âne all geuerd. Darzů han ich dem selben Hansen von Arbun vnd sinen erben in dem selben obgeschriben kouf och gegeben daz winga^ertli ze Berchtramswiler, daz dez Pflůgers waz, och mit aller siner zů geho^erd fúr recht aigen, vnd vmb den selben obgeschriben hof vnd vmb daz winga^ertli hat mir der obgenant Hans von Arbun gegeben sechs vnd viertzig pfund pfening genger vnd gůter Costentzer múntz, der ich gentzlich von im gewert vnd bezalt bin, vnd sont ich vnd all min erben vmb den selben obgescriben hof vnd vmb daz winga^ertli vnd waz darzů geho^eret vnd dis vorgescriben rechten redlichen vnd ewigen koufs, alz vorbeschaiden ist, dez vorgenanten Hansen von Arbun vnd siner erben recht weren sin nach dem rechten, dez aigen nach aigens recht, dez lehen nach lehens recht, vf gaistlichem vnd vf weltlichem gericht gen aller menglich vnd an allen stetten vnd wa si dez nach dem rechten bedurffent ald notdurftig werdent. Ich verzich mich och fúr mich vnd fúr all min erben an dem vorgenanten hof vnd an dem wingarten vnd waz darzů geho^eret gen dem obgenanten Hansen von Arbun vnd gen sinen erben aller aigenschaft aller lehenschaft aller vordrung aller ansprach allez rechtz gaistlichs vnd weltlichs rechtz vnd gerichtz vnd allez v´nsers rechten. Vnd ist dirre vorgescriben kouf geschehen vnd vollefu^ert mit allen den worten werken vnd geta^eten, so von recht oder von gewonhait darzů gehort vnd notdurftig wz. Vnd dez allez ze offem vnd warem vrkúnd vnd sta^eter êwiger sicherhait gib ich vorgenanter Stephan Mentzler fúr mich vnd fúr all min erben dem obgenanten Hansen von Arbun vnd sinen erben disen brief darúber besigelt mit dez erbern mannes V^olrich dez Schribers insigel vnd och darzů vnder Jacob dez Maigers insigel, vnder die beidú insigel ich mich vnd min erben bind vnd willeklich gebunden han, won ich aigens insigels nit han, ze offner vergicht vnd sta^eter ewiger sicherhait aller vorgescribener ding. Wir die obgenanten V^olrich der Schriber vnd Jacob der Maiger beid burger ze Lindow veriehin, daz wir von dez obgenanten Stephan Mentzlers ernstlicher bet wegen v´nsrú insigel fúr in vnd fúr sin erben an disen brief gehenkt habint ze ainer ziugknúzz vnd vestnung dis vorgescriben koufs doch v´ns selb âne schaden. Der geben ward an dem nechsten zinstag nach sant Nicomedis tag nach Cristus gebúrt drúzehenhundert vnd achtzig iar, darnach in dem achtenden iar.

Source Fulltext: Chartularium Sangallense X, Nr. 6271, S. 511-512.