Ich^a) Hainrich Knobloch burger ze sant Gallen tůn kunt vnd vergich offenlich mit disem brieue allen, die in ansehent lesent oder || ho^erent lesen, daz fúr mich kam ze Bernang¹ in dem Rintal an dem na^ehsten ma^entag vor v´nsers herren frôn lichams tag, do ich an stat || vnd in namen Johansan Valken ammans da selbs ze Bernang² vnd von siner bet wegen ze ainem offenn gebannem maiien geriht || offenlich ze geriht saz armen vnd richen, der obgenant amman Johans Valk vnd bat mich darumb fragen an ainer vrtail, ob daz wa^eri, daz ain tohter in disem ampt ab gieng von todes wegen, die ain hagstoltz wa^er, waz da aines herren vnd aines abtes von sant Gallen dez gotzhus vnd sines ammans ze Bernang reht wa^eri. Daz tet ich vnd ward ertailt mit gemainer vrtail, wa^er daz ain tohter ab gieng in disem ampt von todes wegen vnd kain swester hinder ir liessi, die tail vnd gemainde mit ir hetti, daz danne ainem abt dez gotzhus ze sant Gallen von der tohter, die ain hagstoltz wa^er, verfallen si ain rehter val vnd alles daz varent gůte, daz danne die selb tohter nach irem tode gelassen hat, vnd daz o^vch danne ainem amman da selbes ze Bernang von der selben tohter, die also abgangen ist, verfallen sie ir bestes gewand, alz si ze kylchen vnd ze haingarten gieng, die wil si in lip waz. Darnach bat mich aber der vorgenant Johans Valk darumb fragen an ainer vrtail, ob daz wa^eri, daz ain knab in disem ampt ab gieng von todes wegen vnd ain hagstoltz wa^er, er wa^er alt oder jung, waz da danne aines herren vnd aines abtes dez vorgedahten gotzhus ze sant Gallen vnd o^vch sines ammans da selbs ze Bernang reht wa^eri. Daz tet ich aber vnd ward diz alles ertailt von den hoflúten ze Bernang, ze Balga³, ze Ho^ehste⁴ vnd von etweuil burgern von Rinegge⁵, die do vor mir an offem maiien geriht warent vnd die o^vch lehen hattent von dem vorgedahten gotzhus ze sant Gallen, mit gemainer vnzerworffner vrtail, wa^er daz ain knab abgieng in disem ampt von todes wegen, der ain hagstoltz wa^er vnd der kainen elichen brůder hinder im liessi, der tail vnd gemainde mit im hetti, daz danne ainem abt dez vorgedahten gotzhus ze sant Gallen von dem knaben, der ain hagstoltz wa^er, er wa^er jung oder alt, verfallen sie ain rehter val vnd alles daz varent gůte, daz danne der selb knab nach sinem tode gelassen hat, vnd daz o^vch danne ainem amman da selbes ze Bernang von dem selben knaben, der also abgangen ist, verfallen sie sin bestes gewand, alz er ze kylchen vnd ze haingarten gieng, die wil er in lip waz. Vnd dez alles ze ainem waren vrkúnd vnd gantzer sicherhait aller der vorgeschribenen dinge vnd vergiht so han ich Hainrich Knobloch da vorgenant von dez gerihtes wegen min insigel offenlich gehenkt an disen brief, won ez o^vch mit gemainer vrtail ertailt ward, daz ich ez tůn so^elt. Diz beschach vnd ward dirre brief geben ze Bernang an dem vorgeschribenen ma^entag in dem jâr, do man zalt von Cristus gebúrt drúzehenhundert jâr, ahtzig jâr vnd darnach in dem ahtenden jâre.

Source Fulltext: Chartularium Sangallense X, Nr. 6270, S. 510-511.