Vicarius^a) reverendi in Christo patris et domini domini Burkardi dei et apostolice sedis gratia episcopi Constantiensis² in spiritualibus generalis || dilecto in Christo decano decanatus apud sanctum Gallum salutem in domino. Cum dilecti in Christo Johannes dictus Spitz presbiter rectoris^b) || parrochialis ecclesie in Nidernglatt³ Constantiensis dyocesis in dicto decanatu site et Johannes Coci presbiter capellanus seu prebendarius || capelle sancti Johannis Baptiste monasterio sancti Galli⁴ dicte dyocesis annexe predicta sua beneficia ex certis rationabilibus causis ut puta, quia uterque ipsorum alterius beneficio magis preesse potest et prodesse, ad invicem permutare cupientes, nobis patentes litteras patronorum dictorum beneficorum videlicet venerabilis in Christo patris et domini domini Cůnonis abbatis monasterii sancti Galli⁵ predicti ordinis sancti Benedicti sedi apostolice inmediate subiecti patroni parrochialis ecclesie predicte et religiosi in Christo domini Nicolai de V^otzingen custodis et portenarii monasterii sancti Galli⁶ predicti patroni seu collatoris capelle supradicte sigillis eorum pendentibus sigillatas, quibus ipsi domini abbas patronus et Nicolaus custos collator ad huiusmodi permutationem per nos faciendam consensum ipsorum adhibuerunt benevolum et expressum, presentaverint ac dicta ipsorum beneficia ad manus nostras animo et in via permutationis sponte resignaverint nobisque humiliter supplicaverint, ut huiusmodi resignationem auctoritate ordinaria taliter recipere ipsamque permutationem admittere et||
canonice perficere dignaremur. Et quia habita per nos in huiusmodi negotio informatione summaria invenimus, quod uterque permutare volentium beneficio alterius magis preesse potest et prodesse, quodqe etiam utilitas beneficiorum et divini cultus augmentatio evidenter proveniunt ex permutatione huiusmodi, nec invenimus aliquam fraudem symonie vel pactum illicitum intervenisse, idcirco huiusmodi permutationem dicta auctoritate ordinaria admisimus et a prefatis Johanne Spitz et Johanne Coci resignationem beneficiorum suorum in manibus nostris animo permutandi factam recepimus predictumque Johannem Spitz de prefata ecclesia in Nidernglatt ad predictam capellam sancti Johannis Baptiste et ipsum Johannem Coci de dicta capella ad predictam parrochialem ecclesiam in Nidernglatt servatis servandis transtulimus et transferimus per presentes. Quocirca tibi decano supradicto in virtute sancte obedientie precipiendo mandamus, quatenus prefatum Johannem Spitz in possessionem dicte capelle sancti Johannis Baptiste iurium et pertinentiarum ipsius ducas corporalem, faciens sibi de ipsius capelle fructibus redditibus proventibus iuribus et obventionibus universis integre responderi ac reverentiam et obedientiam debitas exhiberi. In quorum testimonium sigillum vicariatus nostri presentibus duximus appendendum. Datum Constantie anno domini millesimo trecentesimo LXXX^mo octavo, XVIII kln. ianuarii, indictione undecima.

Source Fulltext: Chartularium Sangallense X, Nr. 6298, S. 542-543.