Ich^a) Gyli von Stúrfis¹ tůn kunt offenlich mit vrkúnd diss briefs allen den, die in an sehent lesent oder ho^errent lesen, vnd vergich offen||lich mit disem brief fúr mich vnd miner swo^ester kind von Vnderwegen² von der sto^essen wegen, so ich von minen vnd von miner vorgenanden swo^ester || kinden wegen hat mit den edlen wolerbornen herren graf Donaten vnd graf Fridrichen von Tokkenburg³ von Hainrichs wegen ze dem Bach || vnd von Hanses sa^elgen ze dem Bach sins brůder sa^elgen kind wegen, das ich dar vmb lieplich vnd gu^etlich verriht vnd verainbert bin mit den vorgenanden herren von Tokkenburg, vnd han dar vmb fúr mich vnd fúr miner vorgenanden swo^ester kind ansprach vnd reht enpfangen vierzig guldin, der ich vnd miner egenanten swo^ester kind gar vnd ganzlich bezalt vnd gewert sint vnd in vnsern offen nutz komen vnd bewendet sint, vnd dar vmb so han ich mich fúr mich vnd min erben vnd fúr miner vorgenanden swo^ester kind vnd fúr der erben an den vorgenanden Hainrichen ze dem Bach vnd an Hanses sa^elgen kind ze dem Bach an iro kind an iro lip vnd gůt entzigen aller vordrung vnd ansprach vnd entzihe mich och wissentlich mit disem brief fúr vns vnd vnser erben aller vordrung vnd ansprach, so wir vnd vnser vordren bis her zů iro lip vnd gůt hant gehebt oder wir vnser erben fúrbass yemer ko^endint ald mo^ehtint gewinnen. Vnd ist dis beschehen mit aller ehafti gewarsami worten vnd werchen, als es nû vnd hienach kraft vnd maht hat vnd haben sol vnd mag. Vnd des ze vrkúnd vnd ze merer sicherhait aller vorgescribner ding vnd geding han ich Gyly von Stúrfis da vorgenand min insigel offenlich gehenket an disen brief. Der geben ist ze Cur in der statt an dem na^echsten zinstag nach sant Nyclausen tag in dem iar, do man zalt von Cristus gebúrt drúzehenhundert iar, ahtzig iar vnd darnach in dem ahtoden iar.

Source Fulltext: Chartularium Sangallense X, Nr. 6296, S. 541.