Allen^a) den, die disen brief sehent lesent oder ho^erent lesen, kúnd ich Haintzli Wernlis von Geriswîlle¹ Cu^entzlis Wernlis sa^elgen sun vnd vergich offenlich mit disem brieue fúr mich vnd fúr alle min erben, daz || ich mit gůter vorbetrahtung von den nâchgenemten Hugen, Beringer, Růdolfen vnd V^olrich den Schůlmaistern gebrůdern Hugen Schůlmaisters sa^elgen wilunt burgers ze sant Gallen elichen sún disen nachgeschri||benen hof vnd gu^eter, die iro lehen sint von dem erwirdigen gotzhus ze sant Gallen, den hof, den man nemmet die Obern Hůb², gelegen ob Geriswîlle, die zelg, die da stôsset an Albriswille³ vnd an Hetzzenwille⁴, || der vierzehen juchart sint, die zelg, die da stosset gen Wille⁵, der driie vnd zwainzig juchart sint, vnd die zelg, die da stosset gen Ainwille⁶ vnd gen Arnang⁷, der sibenzehen juchart sint, mit den zwain jucharten, die man nemmet daz Lang Velt⁸, der selben driier zelgen aller sint an der summe v´ber ho^vpt, ez sient eggen oder rútinen, vier vnd fúnfzig juchart, daz holtz, daz man nemmet die Wart², daz ainhalb stôsset an der kylchen holtz ze Gosso^vw⁹ vnd anderthalb an V^elis Vorsters sa^elgen suns holtz genant die Wart, die hofwis an der hůb vnder dem hus, ain wisli ob dem hus haisset daz Bru^elli², daz a^ekkerli, daz daran stosset, die wisun in der o^vw gelegen an V^elis Vorsters sa^elgen gůt, ain wisun haisset Núwenwis² o^vch gelegen an V^elis Vorsters sa^elgen gůt, die wisun halb genant die Hůbwis² stosset an V^elis Vorsters sa^elgen tail, die wisun halb genant Lindenwis¹⁰ stôsset o^vch an V^elis Vorsters sa^elgen tail, ain wisli vnd zwai ga^ertli ha^elbú gelegen hinder der wis vnd ain halbs wisli in dem Veltmos², mit hus mit hof mit akkern mit wisen mit wasen mit zwi mit holtz mit veld mit wunn mit waiden mit stegen mit wegen mit wasser mit wasserflússen vnd gengen mit allen rehten nútzzen vnd gewonhaiten vnd mit allem dem, so von reht ald von gewonhait darzů vnd darin geho^erent, ez sie genemptz oder vngenemptz gesůchtz oder vngesůchtz wissentz oder vnwissentz, redlich vnd reht enphangen han mir vnd allen minen erben fro^vwen alz mannen tohtren alz knaben ze ainem rehten sta^eten erbzinslehen vmb ainen sta^eten zins, mit so^elicher beschaidenhait vnd in dem rehten dinge vnd gedinge, daz ich vnd alle min erben, ob ich enwa^er, den vorgeschribenen hof genant die Oberhůb mit hûs mit holtz mit veld vnd mit aller zv^o geho^erde in eren vnd vnwůstlich haben buwen vnd niessen sont, vnd súllent den vorgenanten Schůlmaistern gebrůdern oder iren erben, ob sv´ enwa^erint, da von aller ja^erlich ie ze sant Martis tag vier malter gůter vnd vngeuârlicher vesan, die ze gebenn vnd ze nemenn sient sant Galler messes, fúnf schilling phenning gůter vnd gena^emer Costentzzer múnse, vier herbsthu^enr vnd hundert aiger ja^erlich ze dem hailigen abent ze ostran ze rehtem ja^erlichem zins ân fúrzug ân allen abgang ân alle minrung vnd ân allen iren schaden geben rihten vnd antwúrten sont ze sant Gallen in der stat oder anderswahin ainer mil verre von dem selben hof, wahin sv´ danne wellent. Weles jares aber wir daz niht ta^etint, wie oder welen weg sv´ danne ie dez selben zinses ze gewonlichem schaden koment von phandung von zerung von klag von bottenlon mit brieuen oder von dehainen andern sachen, von dem schaden súllent wir sv´ o^vch gantzlich lo^esen vnd vnschadhaft machen. Vnd han o^vch darumb vnd fúr den v´brigen zins den vorgenanten Schůlmaistern gebru^edern willeklich geben sechsú vnd drissig phunt phenning gůter vnd gena^emer Costentzzer múnse. Ez ist o^vch mit namen berett vnd bedingot, weles jares ich oder min erben, ob ich enwa^er, den vorgeschribenen hof vnd gu^eter selber niht gebuwen mo^ehtint ald wo^eltint, ez wa^er von geueht oder von dehainer lay ander sachen wegen, so hant die vorgenemten Schůlmaister gebrůder oder iro erben, ob sv´ enwa^erint, friies vrlob vnd vollen gewalt, den selben hof mit aller zv^o geho^erde ze besetzzenn, so sv´ danne túrost mugent, vnd iren zins da von dez ersten in ze nemenn. Vnd waz in danne dez selben zinses v´ber wirt, daran sont mir vnd minen erben, ob ich enwa^er, a^ellú v´nserú reht behalten sin an alle geua^erde. Vnd wenne wir danne den selben hof selber buwen wellent, so súllent wir in haben buwen vnd niessen vmb den vorgeschribenen zins vnd in allen den rehten, alz an disem brief da vor vnd hie nach geschriben stat. Vnd wenne ich erstirb vnd enbin von todes wegen, so sont alle min erben fro^vwen alz man tohtren alz knaben den vorgeschribenen hof vnd gu^eter von den obgenanten Schůlmaistern oder von iren erben, ob sv´ enwa^erint, nach tode enphahen, alz dik ez darzů kumpt inwendig dem na^ehsten mânot iekliches besunder mit ainem herbsthůn ze erschatz, vnd sont sv´ danne den selben minen erben den vorgeschribenen hof vnd gu^eter vmb den vorgeschribenen zins lihen vnd in allen den rehten, alz an disem brief da vor vnd hie nach geschriben stat. Weles aber vnder in daz niht ta^et, daz oder die sont ga^entzlich von iren rehten sin an dem selben hof vnd gu^etern vnd die andern, die in danne also enphangen hettint, daran niht sûmen noch ierren in dehainen weg noch mit dehainen sachen. Ez ist o^vch fúrbaz mêr bedingot vnd berett, bescha^ech daz ich oder min erben, ob ich enwa^er, dehaines jares von v´nseren rehten dez vorgeschribenen hofes vnd erblehens gân vnd die verko^vffen wo^eltint, so súllent wir dv´ selben v´nserú reht den obgenanten Schůlmaistern gebrůdern oder iren erben, ob sv´ enwa^erint, dez ersten vail bieten vnd vor ma^englichem ze ko^vffenn geben fúnf schilling phenning Costentzzer múnse na^eher dann ieman andre, ob sv´ sie ko^vffen wellent, wa^er aber daz sv´ sie niht ko^vffenn wo^eltint ald mo^ehtint, so mugent wir dannenhin die selben v´nserú reht wol ze ko^vffenn geben, wem wir wellent, doch inen an allen iren rehten gantzlich vnscha^edlich. Vnd wem wir o^vch danne die selben v´nserú reht ze ko^vffenn gebent, den sont sv´ ez ân allen fúrzug lihen ieklicher hant besunder mit ainem herbsthůn ze erschatz vmb den vorgeschribenen zins vnd in allen den rehten dinge vnd gedinge, alz an disem brief da vor vnd hienach geschriben stât. Bescha^ech o^vch, daz die vorgenanten Schůlmaister gebrůder oder iro erben, ob sv´ enwa^erint, dehaines jares von iren rehten dez vorgeschribenen hofes vnd gu^eter gan vnd die verko^vffen wo^eltint, so sont sv´ mir oder minen erben, ob ich enwa^er, dv´ selben irú reht dez ersten vail bieten vnd vor ma^englichem ze ko^vffenn geben o^vch fúnf schilling phenning Costentzzer múnse na^eher dann ieman andre, ob wir sv´ ko^vffen wellent. Wa^er aber, daz wir sv´ danne niht ko^vffen wo^eltint ald mo^ehtint, so mugent sv´ dannenhin die selben irú reht wol ze ko^vffenn geben, wem sv´ wellent, v´ns an allen v´nseren rehten gantzlich vnscha^edlich. Vnd ze ainem waren vrkúnd vnd ze ainer sta^eten sicherhait aller der vorgeschribenen dinge vnd gedinge so han ich erbetten den beschaidenn Johansen Geriner amman ze Gosso^vw, daz er sin insigel fúr mich vnd fúr alle min erben gehenkt hat an disen brief, won ich aigens insigels niht han. Ich Johans Geriner amman da vorgenemt vergich, daz ich von ernstlicher bet wegen dez vorgenanten Haintzlis Wernlis, won er aigens insigels niht hat, min insigel fúr in vnd fúr alle sin erben gehenkt han an disen brief mir vnd allen minen erben gantzlich vnscha^edlich. Diz beschach vnd ward dirre brief geben ze sant Gallen an dem na^ehsten ma^entag nach sant Ambrosien tag aines hailigen byschofs in dem jar, do man zalt von Cristus gebúrt drúzehenhundert jar, ahtzig jar vnd darnach in dem núnden jâre.

Source Fulltext: Chartularium Sangallense X, Nr. 6318, S. 561-563.