Ich^a) Jacob Růpreht, den man nemmt der Lo^ew, statamman ze sant Gallen¹ tůn kunt offenlich an disem brief allen den, die in sehent oder ho^erent lesen, || das fúr mich kam ze sant Gallen an der na^ehsten mitken vor v´nser frowen tag ze dem a^ernde, do ich ze ainem allichen geriht offenlich ze geriht sass, || Hainrich Keller, den man nemmt der Zingg, Friken Kellers sa^elgen des pfisters wilunt elicher sun burger ze sant Gallen, vnd der nam ze fúrsprechen || Cůnraten ab der Hůb, den man nemmt der Jo^ehler, der offnote vnd veriah offenlich vor mir in gerihte an siner stat vnd von sinen wegen, wie das in die fromen der burgermaister der rat vnd die burger gemainlich der stat ze sant Gallen der sehtzig pfunt pfenning gůter Costentzer múnse, die er vnd Růdolf sa^elig sin brůder oder ir vo^egt vnd frúnd an iro stat inen vormals beuolhen vnd verlihen hattent, vnd aller der zins, so im davon geuallen wa^erint, gantzlich vnd gar gewert bezalt vnd v^ssgeriht hettint, vnd das im die selben burger gemainlich noch sunderlich von des selben geltes noch zinses wegen niht mêr gelten noch widergeben soltint, vnd liess o^vch do ze mâl der selb Hainrich Keller, den man nemmt der Zingg, offenlich vor mir in gerihte frilich vnd willeklich die selben burger vnd die stat ze sant Gallen vnd ir erben vnd nachkomen fúr sich vnd alle sin erben der selben sehtzig pfunt pfenning vnd aller der zins, so im dauon geuallen warent vntz vff disen tag, als dirr brief ist geben, gantzlich quit ledig vnd los. Vnd des ze offemm waren vrkúnde so han ich Jacob Růpreht statamman da vorgenemt min insigel von des gerihtes wegen vnd nâch rehter vrtail gehenkt an disen brief. Darnach vergich ich der obgenant Hainrich Keller, den man nemmt der Zingg, offenlich ain gantz wârhait aller der ding, so von mir da vorgeschriben stat an disem brief, vnd des ze merer sicherhait so han ich erbetten Cůnraten ab der Hůb, den man nemmt der Jo^ehler, minen fúrsprechen in der vorgeschribnen sache, das er sin insigel zů des obgenanten statammans insigel fúr mich gehenkt hat an disen brief ze ainer zúgnust der vorgeschribnen sache, darvnder ich mich willeklich gebunden han aller vorgeschribner sach, won ich aigens insigels nit hatt, des o^vch ich der selb Cůnrat ab der Hůb genant der Jo^ehler offenlich vergich mir vnd minen erben vnscha^edlich. Dis beschach vnd wart dirr brief geben ze sant Gallen an der vorgeschribnen mitken, do man von Cristus gebúrt zalt drúzehenhundert jâr vnd darnach in dem nún vnd ahtzigosten jâre.

Source Fulltext: Chartularium Sangallense X, Nr. 6317, S. 560-561.