Allen den, die disen brief ansehent oder ho^erent lesen, kúnden wir dis nachgen(anten) V^olrich von Ebersperg¹ vnd Nesa von Wolfurt² sin elichi wirtenn vnd veriehen offenlich mit || disem brief, daz wir baidi gemainlich vnd vnuerschaidenlich von v´nser kumberhaftin wegen redlich vnd recht fúr v´ns vnd fúr alle v´nser erben verko^vft haben || die erbern frowen Margrethen Múllerinen wilent Eberhart Sennen sa^elig von Helfentswille³ elichen tohter mit lib vnd mit gůt vnd mit allen rechten nú||tzen gewonhaiten vnd mit aller zůgeho^erd, die v´nser lehen was von dem gotzhus ze sant Gallen, vnd habent wissentklich vnd wolbedahtklich ains ewigen vngeuarlichen kofs ze koffent geben den erwirdigen gaistlichen herren Johansen von gottes verhengnúst abt vnd dem couent gemainlich des gotzhus ze Vischinan⁴ sant Benedicten ordens in Costentzer bistum vnd allen iren nachkomen zů desselben gotzhus handen vmb sehs pfund pfenning alles gůter vnd gena^emer Costentzer múns, dero wir aller gantzlich vnd gar von inan gewert vnd bezalt sien an den stetten, da wir v´nsern fromen nutz geschaffet haben, vnd haben inan dieselben frowen mit lib vnd mit gůt vnd mit aller zůgeho^erd ledklich vnd frilich fúr v´ns vnd fúr alle v´nser erben vf geben vnd zů iren vnd zů ires gotzhus handen braht vnd geuertgot mit des erwirdigen fúrsten v´nsers gna^edigen herren abt Cůnen von gottes gnaden des gotzhus ze sant Gallen⁵ hand vnd si der in üblich nutzlich gewer vnd gewaltsami gesetzt, alz recht sitt vnd gewonlich was vnd alz es billich vnd von recht kraft ha^vt vnd haben sol nu vnd hernach. Vnd haben v´ns darv´ber wissentklich wilklich vnd wolbedahtklich an der obgenanten Margrethen Múllerinen mit lib vnd mit gůt vnd mit aller zůgeho^erd ledklich vnd frilich verzigen vnd verziehen vnd entweren v´ns redlich vnd recht mit disem brief fúr v´ns vnd fúr alle v´nser erben aller aigenschaft aller lehenschaft aller manschaft aller gewer aller besatzung aller kuntschaft aller zúgnúst lút vnd brief aller dienst aller gewaltsami alles tails vnd gemaind aller va^ell vnd gela^ezz alles rechten gaistlichs vnd weltlichs gerichtes aller rechtung aller vordrung vnd ansprach alles fúrzugs vnd vsszugs vnd aller andren sachen vnd geua^erden, so ieman erdenken kan, dar mit wir ald v´nser erben ald ieman andra von v´nsern wegen die obgen(anten) frowen mit lib vnd mit gůt vnd mit aller zůgeho^erd iemer mer kúnden ald mo^ehten angesprechen ald dar mit wir wider disen brief ald kof in dehain wis ald weg kúnden ald mo^ehten gereden ald getůn ald schaffen geta^vn luterlich a^vn geua^erd. Wir so^ellen vnd geloben och redlich vnd recht mit disem brief fúr v´ns vnd fúr alle v´nser erben, die wir vesteklich her zů binden, der obgenanten frowen mit lib vnd mit aller zůgeho^erd vnd dis redlichen kofs der obgenanten abt Johans vnd des couents gemainlich des gotzhus ze Vischinan vnd iro nachkomen vnd desselben gotzhus gen allermenglichem vf gaistlichen vnd vf weltlichen gerichten recht wern ze sint nach dem rechten vnd nach des landes sitten vnd gewonhait a^vn geua^erd, wenn wa ald wie dik si ald die obgenant Margretht Múllerin des noturftig sint ald darvmb mit dem rechten vfgetriben ald angesprochen werdint, daz wir vnd v´nser erben sú dar vmb a^vn ir schaden versta^vn vnd versprechen vnd von der ansprach ledigen sont a^vn widerred vngeuarlich. Vnd des alles ze offem vrkúnd der warhait so haben wir baidú v´nsrú insigel fúr v´ns vnd fúr v´nser erben offenlich gehenkt an disen brief. Der geben ist an dem na^ehsten dunstag nach des haiigen crúcz tag ze maiien, da man zalt von Cristus gebúrt drúzehenhundert vnd ahtzig iar, dar nach in dem núnden jar.

Source Fulltext: Chartularium Sangallense X, Nr. 6321, S. 564-565.