Ich Conrat Brunman amptman miner herschaft von Toggenburg¹ tun kunt vnd vergih dez offenlich an disem brief allen, die in ansehent oder ho^erent lesen, dz Haini Hass an miner herschaft vnd an miner stat offenlich ze gericht sa^vss ze Birbingen² in dem dorff, do kamend fúr in die erber lút Haini A^eppli von Wolmatingen³ vnd fro Elizabeth Engelbrechtin sin elichi frow offneten mit irem fúrsprechen, dz si von dem erbern man V^olrich Altwegger von Gundertzhusen⁴ an barem gůt enphangen habent achtzehen phund gůter phenning Costentzer múnss vnd sigint ouch der gentzlich von im gewert vnd dz si im vnd sinen erben fúr sich vnd ir erben vmb die selben phenning habent ze ko^vffent geben recht vnd redlich iro gůt genant Hugen Engelbrechtz gůt mit aller zů geho^ert, als si vnd ir vordem dz gehebt vnd genossen, dz ze Birbingen gelegen ist, vnd batend ze eruarend an ainer vrtail, wie si dz selb gůt vergen vnd vff geben solten, als recht wer vnd damit der selb V^olrich Altwegger vnd sin erben nu vnd hienach besorget wer, do ward mit gesamnoter vrtail ertailt, dz die frow zů ir stellen solt ir nehsten vattermag vnd rechten vogt, mit dem die sach vollefu^ert wurd, do sait die selb frow vff trúw, dz si ze disen zitten ir nechsten vattermag nit haben mo^eht, do ward ir von gerichtes wegen ze vogt geben Conrat Wilhelm, des si begert, der selb vogt bat inen do ze eruarent an ainer vrtail, wie si nu fúrbas in der sach varen so^elten, als recht wer, do wart mit vrtail ertailt, dz der selb vogt die selben frowen ze drin malen vss dem gericht fu^eren solt vnd si ze ieclichem male fragen solt, ob si dz obgenant verko^vffen willeclich vnd gern ta^et vnd ouch tůn wolt, dz vollefůrt ouch der selb vogt, als im ertailt wart, vnd gieng mit ir ze ieclichem ma^vl wider in dz gericht vnd sait vff sinen ayd, dz si im ze drin ma^vlen gesait vnd vergehen hett, dz si dz selben verko^vffen willeclich vnd gern ta^et vnd ouch tůn welt. Do wart mit rechter gesamnoter vrtail ertailt, sider die selb frow ir erkornen vogt ze drin malen gesait vnd veriehen hett, dz si dz obgenant verko^vffen willeclich vnd gern ta^et vnd ouch tůn wolt, wa denne der vorgenant Haini A^eppli vnd die selb Elizabeth sin elichi frow vnd der selb vogt mit inen da vor gericht an den stab mit ir henden dem obgenanten V^olrich Altwegger dz obgenant gůt vff gebint vnd sich fúr sich vnd ir erben gen im vnd gen sinen erben als irs rechten vordrung vnd ansprach an dem selben gůt mit aller zů geho^erd verzigent vnd inen ouch dz selb gůt denne darnach vergotind von dem lehen herren ainem abt von Crutzlingen⁵, dannen es zinslehen ist. Wenne dz alles bescheh, dz es denne wol durch recht kraft vnd macht hett nach dem rechten. Dz vollefu^erten si ouch ellú drú, als inen mit frag vnd mit rechter gesamnoter vrtail ertailt wart, vnd lobten ouch darzů des selben ko^vffes recht wer ze sind fúr recht zinslehen von Crutzlingen nach recht an alle geuerd, vnd offneten do vor gericht den zins, der dem gotzhus ze Crútzlingen ia^erlichs darab ga^vt, dz ist drú viertal kernen VI s. Costentzer phenning vnd ain vastnacht hůn, vnd der obgenanten miner herschaft von Toggenburg ga^vt ab dem selben gůt ze gewonlicher vogtstúr VII s. d. Costentzer múnss, won die vogt darúber sind. Vnd dez^a) warem vnd offem vrkúnd aller dirre vorgeschriben ding gib ich der obgenant Conrat Brunnman min insigel von des gerichtes wegen an disen brief, won ouch des vor gericht gemůtet vnd ertailt ward, doch miner herschaft von Toggenburg an irem vogtrecht vnd dem lehen herren an der lehenschaft vnd an andren iren rechten vnschedlich. Dirre brief ist ze Costentz geben anno domini M° CCC^mo LXXXVIIII° an dem nehsten donstag nach sant Lucien tag.

Source Fulltext: Chartularium Sangallense X, Nr. 6361, S. 610-611.