+ Philippus^a) + de Alenconio miseratione divina episcopus Ostiensis¹ sacrosancte Romane ecclesie cardinalis apostolice sedis legatus universis Christi fidelibus presentes litteras inspecturis salutem in domino. || Licet is, de cuius munere venit, ut sibi a suis fidelibus digne et laudabiliter serviatur, de habundancia sue pietatis, que merita supplicum excedit et vota, bene servientibus sibi multo maiora || retribuat, quam valeant promereri, nichilominus tamen desiderantes domino reddere populum acceptabilem et bonorum operum sectatorem, fideles ipsos ad complacendum sibi quasi quibusdam || allectivis muneribus indulgenciis scilicet et remissionibus invitamus, ut exinde reddantur divine gratie aptiores. Cum autem dudum felicis recordationis dominus Vrbanus papa VI nos suum et apostolice sedis legatum per suas apostolicas litteras usque ad eiusdem sedis beneplacitum constituens suas alias litteras nobis gratiose concesserit sub hac forma: Urbanus episcopus servus servorum dei venerabili fratri Philippo episcopo Ostiensi apostolice sedis legato salutem et apostolicam benedictionem. Cum te ad Francie, Boemie, Navarre, Dacie, Swecie et Norwegie regna necnon ad Alavmannie, Flandrie, Leodii, Hannonie et Lothoringie partes ac ducatum Barensem² commisso tibi in eis plene legationis officio pro magnis et arduis sacrosancte Romane ecclesie negotiis ac pro salute et pace regum principum magnatum ac iusticia populorum, ut evellas et destruas edifices et plantes uberesque deo et eidem ecclesie Romane ac speratos fructus afferas, tamquam pacis angelum destinemus. Nos volentes, quod regnorum ac partium et ducatus predictorum incole ad pietatis opera exercenda eo fortius animentur, quo spiritualium munerum pociora dona sibi inde conspexerint provenire, presentium tibi auctoritate concedimus, ut omnibus vere penitentibus et confessis, qui ad fabricas singulis ex triginta ecclesiis, de quibus tibi videbitur, manus porrexerint adiutrices, centum dies de iniunctis eis penitenciis valeas relaxare, litteris tuis super indulgenciis huiusmodi per te concedendis post decennium a die ipsarum litterarum tuarum computandum minime valituris. Datum Luce³ VII idus maii, pontificatus nostri anno decimo. Cupientes igitur, ut ecclesia parrochialis in Bernangh⁴ anmerental^b) Constanciensis diocesis a Christi fidelibus devote frequentetur et ut ipsi fideles eo libencius confluant ad eandem, quo ibidem uberius dono celestis gracie conspexerint se refectos, de omnipotentis dei misericordia et beatorum Petri et Pauli apostolorum eius meritis et intercessione confisi omnibus vere penitentibus et confessis, qui in nativitatis circumcisionis epiphanie resurrectionis ascensionis et corporis domini nostri Jesu Christi ac penthecostes necnon nativitatis annunciationis purificationis et assumptionis beate Marie virginis ac nativitatis beati Johannis Baptiste et apostolorum Petri et Pauli predictorum ac ipsius ecclesie dedicationis festivitatibus et in celebritate omnium sanctorum ac per ipsarum nativitatis epiphanie resurrectionis ascensionis et corporis domini nostri Iesu Christi ac eciam nativitatis et assumptionis beate Marie nativitatisque beati Johannis et apostolorum predictorum festivitatum octabas et per sex dies festum penthecostes immediate sequentes causa devotionis ad eandem ecclesiam, quam in ordine ecclesiarum in litteris suprascriptis expressarum vicesimo quinto loco nominamus, accesserint et devote visitaverint et ad fabricam ipsius ecclesie manus porrexerint adiutrices, predictarum litterarum centum et legationis nostre vigore quadraginta dies de iniunctis eis penitenciis misericorditer relaxamus, presentibus quoad centum usque ad decennium dumtaxat et quoad quadraginta dies perpetuo duraturis. Dat. Ayterwange⁵ Augustensis⁶ diocesis, III kl. ianuar., anno domini millesimo trecentesimo nonagesimo, pontificatus sanctissimi domini nostri Bonifacii pape VIllI anno primo.

Source Fulltext: Chartularium Sangallense X, Nr. 6363, S. 613-614.