Wir^a) Cuno von gottes gnaden abt des gotzhus ze sant Gallen¹, das an alles mittel zu gehort L dem stul ze Rom, veriehent mit disem brief offenlich, das fur vns kam ze Wil² in vnsers gotzhLhus statt der edel herr Albreht von Bussnang³ friie vnd ritter vnd gab vns da mit guter L vorbetrahtung ledklich vnd frilich vff an vnser hand disu nahgeschribnen gueter vnd sprach, dieselben guter warint lehen von vns vnd vnserm vorgenanten gotzhus ze sant Gallen vnd an in braht in pfands wis, vnd sint das die guter, item ain hof ze dem Lê⁴ gelegen bi dem wiger Zukkenriet⁵, item ain gut gelegen ze Nidren Vtzwil⁶, das Vlrich Bungelis was, item den zehenden in Engenwis⁴, item ain gutli gelegen ze Adelgasshusen⁷ das Mettelmans was, item ain gutli ze Nidrenach⁴ gelegen, item ain gutli ze Obrenburren⁸ gelegen vnd ain gut in Widan⁹, vnd batt vns ernstlich, dz wir die selben guter vnd allu du guter, die in den selben pfandschilling gehorrent, si sigint genempt oder vngenempt gesucht oder vngesucht funden oder vnfunden, wie si genempt vnd gehaissen sigent vnd an welhen stetten si gelegen sigint, mit allen rehten vnd zugehorden lihint der ersamen fro Nesen her Eglolfs saligen von Wolfurt¹⁰ ritters elichen tohter Vlrichs von Ebersperg¹¹ elichen husfrowen vnd ir liberben, won si es och von reht vnd billich han solti, ze rehtem lehen. Darvmb erhortan wir do sin bett vnd lihent die vorgeschribnen guter vnd och allu andru guter, die in den selben pfandschilling gehortan, genempt oder vngenempt gesucht vnd vngesucht funden vnd och vnfunden, wie die genempt vnd gehaissen sigint oder an welhen stetten si gelegen sigint, mit allen rehten nutzen vnd gewonhaiten vnd mit aller zugehord der vorgenampten fro Nesen vnd ir liberben ze rehtem lehen, doch also dz die liberben die selben guter vnd lehen ie nah tod enpfahen sont vnd also vns vnd vnserm vorgeschribnen gotzhus an vnsern rehten gantzlich vnschadlich. Wir habent der selben fro Nesen die gnad getan vnd fryhait geben, dz si daz vorgenampt lehen vnd guter haben niessen besezzen vnd entsezzen sol vnd mag ze gelicher wis vnd in allem rehten, als ob si ain man war. Der selb herr Albrecht entzeh sich och do an vnser hand redlich vnd reht fur sich vnd all sin erben vnd enziht sich och mit disem brief aller aigenschafft aller lehenschafft aller kuntschafft aller gewer aller besazzung aller zugnust lut vnd brief, die er von der verpfandung wegen ietz hatt oder noch in kunftigen ziten iemer me funden wurdin von im oder von sinen erben, alles gaistlichen vnd weltlichen rehtes aller reht vnd rehtung aller vordrung vnd ansprach, so er ald sin erben zu den obgenempten gutern vnd pfandschilling allen oder zu dehainem gut besunder, es si genempt oder vngenempt, ie gehebt hatt oder noch in dehain wis gehaben vnd gewinnen mohtin. War och, dz der vorgenampt herr Albreht ald sin erben oder ieman andre von iro wegen dehain brief vnd vrkund me fundint in kunftiger zit, von der selben brief vnd vrkund wegen si die vorgenampt fro Nesen ald ir liberben an den vorgeschribnen gutern genempten vnd vngenempten allen oder an dehainem besunder gesumen gehinderren vnd an den nutzen geierren mohtin, die selben brief vnd vrkund sullent dem selben hern Albrehten vnd sinen erben vnd och allen den, die si furbutent vnd zogent, ab tod vnnutz vnd vnkrefftig sin vnd inen dehainen nûtz noch fromen beren noch bringen in dehain^b) vnd der vorgenampten fro Nesen vnd allen ir liberben gantzlich vnschadlich sin. Vnd ist diz beschehen vnd redlich vollfurt nach vnsers gotzhus gewonhait vnd reht, als es krafft vnd maht haben sol vnd mag ietz vnd hienach. Vnd des hiervber ze warem vrkund haben wir abt Cun da obgenempt vnser insigel offenlich gehenkt an disen brief. Darnach vergich ich Albreht von Bussnang frie vnd ritter, das alles dz war ist, das der hohwirdig furst Cun von gottes gnaden abt des gotzhus ze sant Gallen min gnadiger herr von mir an disem brief veriehen vnd verschriben hat, vnd ze noch merer sicherhait derselben ding han ich och min aigen insigel fur mich vnd all min erben offenlich gehenkt an disen brief. Der geben ist an dem nahsten zinstag vor vnser frowen tag ze herbst in dem jar, do man zalt von Cristi geburt tusent druhundert ahtzig vnd nun jar.