Wir^a) Cuno von gottes genaden abt des gotzhus ze sant Gallen¹, das an alles mittel zu gehort dem stul ze Rom, veriehent L mit disem brief, das fur vns kam ze Wil² in vnsers gotzhus statt an dem tag, alz dirr brief geben ist, vnsers gotzhus man L Cunrat von Vtenwille³ burger da selbs ze Wil vnd sprach, das ain zehend ze Kilchberg⁴, den man nemmet Vtawilles zehend, L an korn sin reht lehen war von vns vnd vnserm gotzhus ze sant Gallen, vnd batt vns ernstlich, dz wir den selben vorgenanten korn zehenden von im vff namint an vnser hand vnd im die gnad tatint vnd den selben zehenden wider lihint im vnd Greten vnd Gerinen sinen tohtran vnd och allen den kinden knaben vnd tohtran gelich, die im werdent bi Adelhaiden Peter Hofstetters elichen tohter siner elichen wirtinnen, ze rehtem lehen. Darvmb erhorton wir do sin bett vnd nament den selben vorgenanten zehenden von dem selben Cunrat vff an vnser hand vnd lihent den von besunder gnaden wider dem ietzgenempten Cunrat von Vtenwille, Greten, Gerinen sinen tohtran vnd och allen den kinden, die im elich werdent bi der vorgenanten Adelhaiden siner elichen husfrowen, knaben vnd tohtran gelich ze rehtem lehen vnd lihentz in och mit disem brief, doch also dz die elichen kind den vorgenanten zehenden ie nah tod enpfahen sont vnd also, wz wir in durch reht lihen sont, vnd ist diz beschehen vnd redlich vollfurt nah vnsers gotzhus gewonhait vnd reht, als es krafft vnd maht haben sol vnd mag ietz vnd hie nah. Vnd des ze vrkund geben wir abt Cun da obgenant dem vorgenanten Cunrat vnd sinen elichen kinden disen brief darvber mit vnserm insigel versigelt. Der geben ist an dem nahsten mantag vor der mann vasnaht in dem jar, do man zalt von Cristi geburt tusent druhundert vnd nuntzig jar.