Wir Cun von gottes genaden abt des gotzhus ze sant Gallen¹, das an alles mittel zu gehort dem stul ze Rom, L veriehent mit disem brief, das fur vns kam an dem nahsten mantag nah mitter vasten der vest Lutz der Sury² L vnser vnd vnsers gotzhus getruwer dvnd^a) sprach, dz dis nahgeschribnen lut vnd guter von vns vnd vnserm L vorgeschribnen gotzhus sin reht lehen warin, vnd sind das die lut Johans Sonruter, Bentz sin bruder, Burk. Kratzzer, Cuni vnd Claus Keller gebruder, Vli Fuchs, item so sind diz guter, item das gut ze dem Obren Mazzen³, item das gut ze dem Nidren Matzzen⁴, item die muli im Hag⁵, item den hof zem Schyrinen⁶, item vnd ain hof zem Albris⁷ vff dem Gibel genampt, vnd batt vns ernstlich, das wir die selben lut vnd guter vom^a) im vff namint an vnser hand vnd die selben lut vnd guter lihint dem beschaidnen Johansen von Schonow⁸ zu der erberen Margarethen Josen des Lochlers elichen tohter siner swoster tohter Cuntzen von Neidegg⁹ elichen wirtinnen vnd ir elichen liberben handen in tragers wis, mit solicher beschaidenhait, das die selb Margaretha sin swoster tohter vnd ir elichen liberben nah des egenampten Lutzen tod die vorgeschribnen lut vnd guter mit aller zu gehord haben niessen besezzen vnd entsezzen sont vnd mugent mit allen rehten an aller mangklichs hindernust. Darvmb erhortont wir do sin bett vnd nament die vorgenampten lut vnd guter mit aller zu gehord von dem selben Lutzen vff an vnser hand vnd lihent die selben lut vnd guter dem vorgenampten Johansen von Schonow zu der selben Margarethen vnd ir elichen liberben handen, das er darvber ir getruwer trager sin sol, vnd lihentz im och mit disem brief mit der beschaidenhait, als vorgeschriben stat, vnd also vns vnd vnserm vorgenampten gotzhus an allen vnsern rehten gantzlich vnschadlich. Wir habent och der selben Margarethen vnd ir elichen liberben, das tohtran warint, die gnad getan vnd fryhait geben, dz si die vorgenampten lut vnd guter haben vnd niessen sont vnd mugent ze gelicher wis vnd in allem rehten, als ob si man warint. Vnd ist diz beschehen vnd redlich vollfurt nah vnsers gotzhus gewonhait vnd reht, als es krafft vnd maht haben sol vnd mag ietz vnd hie nah. Vnd ze warem vrkund haben wir abt Cun da obgenampt vnser insigel offenlich gehenkt an disen brief. Darnach vergich ich Lutz der Sury da obgenampt, das alles das war ist, dz hohwirdig furst Cun von gottes genaden abt des gotzhus ze sant Gallen von mir an disem brief veriehen vnd verschriben hat, vnd ze merer sicherhait der selben ding so han ich min aigen insigel offenlich gehenkt an disen brief. Der geben ist an dem nahsten mantag nah mitter vasten in dem jar, do man zalt von Cristi geburt tusent druhundert vnd nuntzig jar.