Allen^a) den, die disen brief ansehent oder horent lesen, kund ich Ital Herman von Landenberg von Griffense gesessen ze Bichelse¹ ze diLsen ziten vogt vnd pfleger Annen, Beringers, Margrethen, Vdelhilten vnd Rudis, mines lieben bruder salgen Rudis von Landenberg von Griffense², L den man nampt von Sunnenberg³, elicher kint, vnd vergich offenlich mit disem brief, daz ich wissentklich vnd wolbedahtklich an der ietzgenanten mines bruder L salgen kint statt von iro kumberhaftin wegen fur su vnd fur alle iro erben redlich vnd recht verkoft han den erbern kneht Johansen Lieb von Stettfurt⁴ mit lib vnd mit gut vnd mit allen rechten nutzen vnd zugehorden, derselb kneht der obgenanten kint lehen was von dem hohwirdigen fursten minem gnadigen herren abt Cunen von gottes gnaden des gotzhus ze sant Gallen⁵ vnd von demselben sinem gotzhus, vnd han ains vngeuarlichen ewigen kofs ze koffent geben demselben minem gnadigen herren abt Cunen des gotzhus ze sant Gallen vnd allen sinen nachkomen zu desselben sines gotzhus handen vmb nun pfund alles guter vnd genamer haller, dero ich och aller gantzlich an der egedahten kint statt von dem obgenanten Johansen Lieben bezalt bin an den stetten, da ich derselben kint wahsenden schaden mit verkomen vnd gewendet han, vnd och vmb alle rechtung vordrung vnd ansprachen, die derselb Johans Lieb ald sin erben iendert hant ie gehattent ald hernach gewinnen mugent zu Walther Ibergers hofstatt vnd zu dem wingarten ze Stettfurt gelegen, daz ietzo Cuni Ffrie vnd sin husfrow inne hant vnd buwent vnd demselben Walthern Iberger verzinsent, dieselben sinu rechtung der ietzgenanten hofstatt vnd wingarten er och den obgenanten kinden vfgeben vnd zu iren handen bracht hett, alz recht was, vnd han dem obgenanten minem gnadigen herren abt Cunen denselben kneht Johansen Lieben mit aller zugehord an der vorgedahten kint statt ledklich vnd frilich fur mich fur dieselben kint vnd fur alle ir erben an sin hand vffgeben vnd zu sinen vnd zu siner nachkomen vnd zu sines gotzhus handen geuertgot vnd bracht vnd in des in liblich nutzlich gewer vnd gewaltsamin gesetzt, alz recht sitt vnd gewonlich was, vnd han mich hier vber an der obgedahten kint statt ledklich vnd frilich fur mich vnd fur alle min erben vnd fur dieselben kint vnd fur alle ir erben gegen dem obgenanten abt Cunen vnd gegen sinen nachkomen vnd gegen demselbem sinem gotzhus verzigen vnd entwert vnd verzich vnd entwer mich och redlich vnd recht mit disem brief an dem obgenanten kneht mit allen rechten vnd zugehorden aller aigenschaft aller lehenschaft aller manschaft aller kuntschaft aller besatzung aller gewer aller zugnust lut vnd briefen alles erbs aller vall vnd gelass aller dienst alles gewaltes alles rechten gaistlichs vnd weltlichs gerichts aller rechtung aller vordrung vnd ansprachen, so die obgenanten kint ald ir erben ald ich ald min erben ald ieman andra von iro wegen zu dem obgenanten kneht mit allen rechten vnd zugehorden ie gehattent ald hernach iemer mer gewinnen mohtent von recht ald von gewonhait ald von dehainerlay andren sach wegen, so ieman erdenken kan, an geuerd. Ich sol vnd geloben och redlich vnd recht mit disem brief fur mich fur die obgenanten kint vnd fur alle ir erben, die ich vesteklich herzu bind, in dirr sach des obgenanten knehtes mit aller zugehord vnd och dis kofs recht wern ze sint nach dem rechten des obgenanten abt Cunen siner nachkomen vnd des obgenanten sines gotzhuses gen allermenglichem vf gaistlichen vnd vf weltlichen gerichten, wenn wa ald wie dik si ald der obgeschriben kneht des bedurfent vnd noturftig sint ald dar vmb mit dem rechten vfgetriben ald angesprochen werdent, daz ich vnd die obgeschribnen kint vnd ir erben su dar vmb allweg verstan vnd versprechen sollent nach dem rechten luterlich an geuard. Vnd des alles ze offem vrkund so han ich obgenanter Ital Herman von Landenberg min insigel in vogtes wis an der obgenanten kint statt offenlich gehenkt an disen brief, vnder desselben vnsers vogtes vnd lieben vettern insigel wir obgenanten Anna, Beringer, Margretha, Vdelhilt vnd Rudi wilent Rudis salgen von Landenberg von Griffense genant von Sunnenberg elichi kint vns wilklich verbunden haben, war vnd stat ze haltent vnd ze lassemt ^b) alles, so von vns an disem brief geschriben stat. Der geben ist an der nachsten mitwochen nach sant Gregorien tag, do man zalt von Cristus geburt druzehenhundert jar, dar nach in dem nuntzigosten jar.