Allen^a) den, die disen brief ansehent lesent oder horent lesen, kund ich Johans Gupsiner burger ze sant Gallen vnd vergich L offenlich an disem brief fur mich fur alle min erben vnd nachkomen, won mir die ersamen wisen der burgermaister vnd die L rat der stat ze sant Gallen von miner ernstlichen bet willen gunnen vnd erlobt hant, daz ich daz hus gelegen vor L Spiser tôr¹ in minem garten, der ainhalb stosset an Walther Schurpfen garten vnd anderthalb an Kaspar Volis, an Wilhelm vnd Erhartz der Blârrer garten stosset, vornan an der stat graben vnd stosset hinnen an Bartholome Blârrers garten, daz selb hus in den vorgeschribenn minen garten an dez obgenanten Bartholome Blârers garten ze buwenn vnd ze setzzenn, daz selb hus niht hocher sin sol dann zwaier vngefarlicher gadmer hoch vnd an der witi zwainzig vngeuarlicher schuch wit, also daz ich die vier wend an dem selben hus mit laim oder mit phlaster bewerffen sol, darumb so han ich mich mit guter vorbetrahtung gen den obgenanten dem burgermaister vnd den raten ze sant Gallen willeklich verbunden vnd bind mich vnd alle min erben vnd nachkomen, in dero hand vnd gewalt der selb min gart iemer kumpt ald ist, darzu mit kraft diz brieues, welhes jâres oder welher zit in dem jâr mich oder min erben ald nachkomen, in dero hant vnd gewalt der selb min gart danne ist ald niessent, die vorgedahten der burgermaister vnd die rat ze sant Gallen ermanent, daz selb hus ab ze brechenn vnd dannen ze furent vnd sich dez erkandint, daz daz selb hus der vorgedahten stat ze sant Gallen schaden ald gebresten bringen moht, daz ich ald min erben ald nachkomen, in dero hant vnd gewalt der vorgeschriben min gart iemer kumpt ald ist, danne daz selb hus vnuerzogenlich brechen vnd ab der selben hofstat vertgen sullent ân allen der vorgedahten dez burgermaisters der rat vnd der stat ze sant Gallen schaden vnd ân alle widerred. Vnd dez alles ze offemm waremm vrkund vnd stater sicherhait aller der vorgeschribenn dinge vnd vergiht so han ich Johans Gupsiner da vorgenant fur mich vnd alle min erben vnd nachkomen min aigen insigel offenlich gehenkt an disen brief. Der geben ist ze sant Gallen an vnser frowen abent ze dem arnde in dem jar, do man zalt von Cristus geburt druzehenhundert jâr vnd darnach in dem nunzigostem jâre.