Wir^a) der amman der rate vnd die burger gemainlich ze Wurtzen¹ veriehen offenlich mit disem brieue vnd L tuen kunt allermenglich, als sich der edel vnser lieber gnediger herre hern Johanns truchsess ze Waltpurg durch L vnser vnd des gemainen lands nutz vnd fromen willen zu den erbern vnd wisen den siben stetten vmb den Se L Costentz, Vberlingen, Lyndow, Rauenspurg, sant Gallen, Wangen vnd Buchorn verstrikt vnd verbunden hat vnd als wir ym vnd sinen amptluten vnd vogten oder wem er sin sach empfilht sweren sullen gelert aid zu den hailigen mit ufgepotnen vingern, wenn er vns oder sin amptlut vnd vogt oder wem er sin sach empfilht manent vnd zusprechent, den obgenanten siben stetten gemainlich oder besunder ald den yren ze helffen, das wir das denn vnuerzogenlich bi den ayden tun sullen, als das der houptbrieue wiset vnd seit, den er den selben stetten darumb besigelt vnd gegeben hat. Bekennen wir vns mit disem brieff, das wir den selben aide dem egenanten vnserm herren dem truchsessen sinen vogten vnd amptluten also gesworn vnd getan haben. Mit vrkund dis brieues daran wir vnser stat ynsigel offenlich gehenkt haben. Der geben ist an sant Waltpurg tag ze ingandem maigen nach Cristi geburt drivzehenhundert vnd nivntzig yar.