Wir^a) der amman der rate vnd alle burger gemainlich rich vnd arme der stett Sulgen¹ vnd Walse² veriehen offenlich mit disem brieff vnd tuen kunt L allermenglich, als sich der edel vnser lieber gnediger herre hern Yohanns truchsesse ze Waltpurg³ durch vnser vnd des gemainen lands nutz vnd fromen willen L zu den erbern vnd wisen den siben stetten vmb den Se⁴ Costentz, Vberlingen⁵, Lindow⁶, Rauenspurg⁷, sant Gallen, Wangen⁸ vnd Buchorn⁹ verstrikt vnd verpunden hat L vnd als wir im vnd sinen amptluten vnd vogten oder wem er sin sach empfilht sweren sullen gelert aid zu den hailigen mit uffgebotnen vingern, wenne er oder sin amptlut ald vogt vns egenanten zwo stette gemainlich oder besunder manent oder zusprechent, den obgenanten siben stetten gemainlich oder besunder ald den iren ze helffent, daz wir das denn vnuerzogenlich bi dem aide tun sullen, als das der houptbrieue wiset vnd seit, den er den selben stetten darumbe besigelt vnd gegeben hat. Bekennen wir vns mit disem brieue, das wir den selben aid dem egenanten vnserm herren dem truchsessen sinen vogten vnd amptluten also gesworn vnd getan haben, doch vnser herrschafft von Osterrich iriv recht vsgesetzt vnd vsgenomen ane alle geuerde. Mit vrkund dis brieues daran wir vnser stette gemainiv ynsigel offenlich gehenkt haben. Der geben ist an sant Waltpurg tag ze yngandem maygen nach Cristi geburt drivzehenhundert vnd nivntzig yare.