Allen^a) den, die disen brief ansehent lesent oder horent lesen, kund ich Johans Switzzer von Hochst¹ Hainrich Berglers salgen sun vnd vergich offenlich mit disem brief, alz L mich die frômen wisen der burgermaister vnd der rat ze sant Gallen gehainmot vnd in iro vanknust vnd banden hatten vmb daz ich alz frauellich vnbeschaidenlich L rett vnd tat in der selben iro stat ze sant Gallen an crutzmitwuchen, do ich mit andaht mit ernst durch gottes willen vnd fur gemainen gebresten alles L landes mit vnserm hailtum vnd mit vnserm crutz von Hochst solt gegangen sin, alz von alter gewonlich gewesen ist. Won aber su mich begnadet hant vnd mich durch min durch miner frunde vnd ander erber lut ernstlicher bet wegen ledig vnd vss der vanknust gelassen hant, darumb so han ich willeklich vnd vnbetwungenlich vngebunden vnd vngeuangen mit guter vorbetrahtung offenlich gesworn ainen gelerten aid zu got vnd ze den hailigen mit vfgehabenen vingern, vmb die vorgedahten vanknust vnd getat der vorgedahten dez burgermaisters dez râtes vnd aller burger vnd burgerinen gemainlich der stat ze sant Gallen vnd iro ieklichs besunder vnd mit namen aller dero, wer die sint, die an der selben miner vanknust schuld gehebt hant hainlich oder offenlich mit raten ald^b) mit getaten ald in dehain wis, luter gut frund ze sinne vnd alle min frund inen darumb ze frunde ze gewinnen ân allen furzug vnd die selben vanknust niemer ze andenn noch ze aferrenn weder mit gaistlichem noch mit weltlichem geriht noch ân reht weder mit worten noch mit werken noch in kain wis noch nieman andre an miner stat noch von minen wegen ân alle geuarde, vnd han inen hierumb zu mir ze merer sicherhait ze rehten burgen geben vnd gesetzt Haintzzen Scherer von Rebstain² vnd Cuntzlin Her Burger den kursinner, den man nempt Cuntz von Hochst, baid burger ze Lindow³, die hant och baid willeklich gesworn ietwedre besunder ainen gelerten aid zu got vnd zu den hailigen mit vf gehabenen vingern, ob daz war, daz got niht welle, daz ich den vorgedahten aid iemer vber fur ald ieman von minen wegen an dehainen vorgeschribenn stukken, wenn danne dannenhin die selben vorgedahten burgen von dem obgenanten dem burgermaister dem rat vnd den burgern ze sant Gallen ermant werdent ze hus ze hof oder vnder ogen mit botten oder mit brieuen, daz su sich darnach inrent dem nahsten manot baid oder ainer vnder in, wedre vnder in dann gemant wirt, mit iro selbes liben ân allen furzug antwurten sullent gen sant Gallen in die stat vnd sullent da in offner wirt gastgeben huser bi vailem gut reht giselschaft laisten ietwedre besunder ie zwai vnuerdingoter mal an dem tag ân geuarde vnd sullent von der selben sant Gallen stat noch giselschaft niemer lassen noch komen won mit der egenanten dez burgermaisters dez rates vnd der burger gemainlich ze sant Gallen gutem willen vnd mit iro vrlob. War aber, daz mich die selben burgen den obgenanten dem burgermaister vnd dem rat ze sant Gallen nach der egenanten manung inrent dem nahsten manot wider antwurtint in die selben stat ze sant Gallen vnd in der selben burger band vnd vanknust, daz su min sicher sien, ze gelicher wise vnd in aller der masse, alz ich ietz vff disen huttigen tag, alz dirre brief ist geben, in iro banden gewalt vnd vanknust gewesen bin, so sullent danne dannenhin die vorgenanten burgen baid vmb die vorgeschribenn burgschaft vnd der aide, so su gesworn hant, gar vnd gantzlich quitt ledig vnd los sin, vnd sol mich noch die vorgenanten burgen hie vor noch hie wider niht schirmen noch gut sin enkain andri giselschaft kain frihait kain gewonhait kain buntnust kain burgreht kain lantfrid kain acht noch banne kain reht dez landes noch der stette kain gaistlich noch weltlich geriht noch enkainer lay ander sache noch furzug. Vnd dez ze offemm waren vrkunde vnd stater sicherhait aller der vorgeschribenn dinge vnd vergiht so han ich Johans Switzzer da vorgenant erbetten den ersamen Johansen von Schonow⁴, daz er sin insigel fur mich gehenkt hat an disen brief, vnder dez selben insigel ich mich willeklich gebunden han, won ich aigens insigels niht han, dez och ich obgenanter Johans von Schonow offenlich vergich an disem brief mir vnd allen minen erben vnschadlich. Darnach veriehent wir die vorgenanten burgen Haintz Scherer vnd Cuntzli Her Burger ainer gantzzen warhait aller der dinge vnd gedinge, so von vns an disem brief da vorgeschriben stant, vnd ze merer sicherhait der selben dinge so han ich Cuntzli Her Burger da vorgenant min aigen insigel offenlich gehenkt an disen brief, vnd won ich der obgenant Haintz Scherer aigens insigels niht han, so han ich erbetten den wolbeschaidenn Cunrat Sarrin burger ze sant Gallen, daz er sin insigel fur mich gehenkt hat an disen brief, vnder dez selben insigel ich mich willeklich gebunden han, dez och ich obgenanter Cunrat Sarri offenlich vergich an disem brief mir vnd allen minen erben vnschadlich. Diz beschach vnd ward dirre brief geben ze sant Gallen an dem nahsten fritag nach vnsers herren vffart tag in dem jâr, do man zalt von Cristus geburt druzehenhundert jar vnd darnach in dem nunzigostem jâre.