Ich^a) Othmar Vogel der ledergarw burger ze sant Gallen tun kunt vnd vergich offenlich an L disem gegenwurtigen brief allen, die in ansehent lesent oder horent lesen, daz ich mit wolbedahtem L mut willeklich frilich vnbetwungenlich offenlich gesworn han ainen gelerten aid ze got vnd L ze den hailigen mit vf gehabenen vingern, war daz ich dehainer lay stoss sach oder ansprachen hett oder hinnenhin iemer gewunni zu gemainer stat ze sant Gallen oder zu dehainem burger ald burgerinen besunder ze sant Gallen, wenn vnd alz dik daz beschach, vnd wolt ich danne ie darumb rehtes niht enbern, daz ich danne ie darumb rehtes pflegen vnd reht von in nemen sol vnd wil ze sant Gallen in der stat vor irem geriht vnd niendert ander swa nach der selben stat reht vnd gewonhait, es war danne, daz ich da selbs rehtlos gelassen wurdi vnd daz daz kuntlich da wurdi, so ist mir behalten vnd in dem aid vss gelassen, daz ich daz reht ie danne, von dem ich dann rehtlos gelassen bin, ander swa suchen sol vnd mag, da ez dann billich vnd muglich ist, ân alle geuarde. Vnd dez alles ze offemm waren vrkund vnd stater sicherhait aller der vorgeschribenn dinge vnd vergiht so han ich Ôthmar Vogel da vorgenant min aigen insigel offenlich gehenkt an disen brief. Der geben ist ze sant Gallen an dem nahsten mantag nach vnsers herren vffart tag in dem jar, do man zalt von Cristus geburt druzehenhundert jâr vnd darnach in dem nunzigostem jâre.