Dem erwirdigen vnserm gnadigen herren Cunen von gottes gnaden abt des gotzhus ze sant Gallen¹ L enbieten wir frow Clement geborn von Tokkenburg² wilent her Hainrichs salgen hern ze Hewen L elichi vrow, Peter vnd Wolfli gebruder herren ze Hewen³ ir elich sun vnd Johans herr L ze Hewen⁴ ir vetter vnd ze disen ziten der ietzgenanten Clementen rechter vogt vnser willig dienst in allen sachen. Vwer erwirdi tun wir ze wissent, daz wir die vorgen(anten) Clement, Peter vnd Wolfli herren ze Hewen mit her Johansen herren ze Hewen min der vorgenanten Clementen vogt guten willen vnd gunst dem beschaiden Walthern Iberger versetzt haben den zehenden Zutzwille⁵ an win vnd an korn vnd mit aller zugehord vmb nuntzig pfund pfen(ning) guter Costentzer muns ald aber ie zwen gut geng vnd gab haller fur ainen pfen(ning), der von vch vnd von vwerm gotzhus vnser recht pfand ist. Vnd wan wir selber zu vch nit komen mugent, so senden wir denselben zehenden mit aller zugehord mit disem brief vf an vwer hand in aller der wis vnd rechten, alz ob wir selber vor vch zegegen warint, vnd bittent vch ernstlich, daz ir denselben^a) zehenden mit aller zugehord dem vorgenanten Walthern Iberger lihent in pfandes wis vnd vwern willen vnd gunst zu derselben versatzung gebint, vnd daz ir im den pfandbrief, den er dar vmb von vns hat versigelten mit vnsren insigeln, och mit vwerm insigel besigillen wellint iemer durch vnsern willen, wan ir vns besunder trw vnd fruntschaft dar an erzogent. Vnd des ze ainer warhait haben wir die vorgen(anten) frow Clement, Peter vnd Wolfli ir sun vnd Johans herren ze Hewen derselben Clementen vogt vnsru insigel offenlich gehenkt an disen brief. Der geben ist ze Engen⁶ in vnser stat an vnsers herren fronlichames aubent, do man zalt von Cristus geburt druzehenhundert jar, dar nach in dem nuntzigosten jar.