Dem erwirdigen vnserm gnadigen herren Cunen von gottes gnaden abt des gotzhus L ze sant Gallen enbieten wir frow Clement geborn von Tokkenburg wilent her Hainr. L salgen herrn ze Hewen elichi frow, Peter vnd Wolfli gebruder herren ze Hewen ir elich L sun vnd Johans herr ze Hewen ir vetter vnd ze disen ziten der ietzgenanten Clementen rechter vogt vnser willig dienst in allen sachen. Vwer erwirdi tun wir ze wissen, daz wir die vorgen(anten) Clement, Peter vnd Volfli von Hewen mit des egenanten her Johansen herren ze Hewen min der vorgenanten Clementen vogt guten willen vnd gunst den erbern luten Petern Trunger burger ze Wil¹, Adelhaiten siner elichen wirtin vnd Nesen iro elichen tohter inan allen drien gemainlich vnd vnuerschaidenlich ze rechtem libding vnd in libdings wis, alle die wil vnd alz lang su alli ald iro dehaines vnder inan lebt, ze niessent vnd inzenement ze koffent geben haben zehen mut kernen vnd dru malter habern iarliches gelts vsser dem kelnhof in Rindal², vsser Omen hof, vsser Wunnenbergs gut, vsser dem Zuben gut, vsser des Frien hof vnd vsser allen vnsern rechtungen sturen vnd zinsen, so wir in Rindal iendert haben, dieselben guter allu vnd och die zins vnd sturen von vch vnd von vnserm^a) gotzhus vnser recht lehen sint, alz dis alles in dem kofbrief, den si von vns dar umb inne hant, volkomenlicher geschriben statt. Vnd wan wir ze disen ziten selber zu vch nit komen mugent, so senden wir die obgenanten zehen mut kernen vnd dru malter habern gutes vnd genames Wiler messes iarliches geltes ab vnd vsser den obgeschribnen gutern sturen zinsen vnd rechtungen mit disem brief vnd bi vnserm lieben amptman Vlrichen dem Gubler vf an vwer hand in aller wis vnd in allem rechten, alz ob wir selber zegegen warint. Vnd bitten vwer gnad ernstlich, daz ir vwern gunst vnd willen zu dem vorgedahten kof in aller wis vnd mazz, alz der kof brief wiset, den wir dar vber versigelt hant, geben wellent, vnd daz ir den obgenanten Petern Trunger, Adelhaiten siner elichen wirtin Johansen Horners elichen tohter vnd Nesen iro elichen tohter inan allen drien gemainlich vnd vnuerschaidenlich die vorgeschribnen zehen mut kernen vnd dru malter habern geltz ab vnd vsser den obgenanten gutern sturen zinsen vnd rechtungen in Rindal ze libding vnd in libdings wis ze end iro aller drier wil ze niessent lihen wellent. Dar an erzogent ir vns besunder liebi vnd fruntschaft. Vnd des ze warem vrkund so haben wir obgen(anten) frow Clement, Peter vnd Wolfli ir sun vnd Johans herr ze Hewen derselben Clementen vogt vnsru insigel offenlich gehenkt an disen brief. Der geben ist ze Engen in vnser statt an der nahsten mitwochen nach sant Vrbans tag, do man zalt von Cristus geburt druzehenhundert iar, dar nach in dem nuntzigosten jar.