Allen^a) den, die disen brief an sehent oder horent lesen, kunde ich Bilgri Russinger der alt vogt ze Rapreswille¹ vnd vergich offenlich an disem brief, daz ich ze Rapreswille an miner genadiger herschaft statt L von Oster(rich) offenlich ze gerichte sazz an offener strasse, vnd kam da fur mich in gerichte Johans Rordorff von Zurich burger ze Rapreswille vnd Verena sin eliche husfrowe mit dem selben Johans L Rordorf ir elichen huswirte vnd ir rechten vogte ze einem teil vnd Vlrich Eigendal burger ze Winterthur² in namen vnd an statt Johans Steinkelrs burgers ze Winterthur ze dem andren teil, L vnd mit guter vorbetrachtung gesundes libes sinnen vnd mutes veriahen da vor mir die vorgenanten Johans Rordorf vnd Verena sin eliche husfrowe fur sich vnd alle ir erben, daz su beidi recht vnd redlich in eines ewigen koffes wise verkoft vnd dem vorgenanten Steinkelr vnd sinen erben ze koffenne geben hettin iren teil des zehenden gelegen ze Basserstorff³ genant Rordorfs zehend, den si mit Heinrich Rordorff ir bruder verkoft hettin, als Heinrich sinen teil och mit ynen dem egenanten Steinkelr ze koffenne geben hant, in dem selben zehenden Hartman Rordorf ir bruder noch ein dritten teil hat vnd nicht me, als der selb zehende der vorgenanten Rordorff ir aller driger recht gemein gewesen ist vnd die egenanten Johans, Heinrich vnd Verena iren teil vnd als ir recht, so su hant an dem vorgenanten zehenden, mit Hartmans Rordorffs willen vnd gunst verkoft hant, vnd ist der koff beschehen vmb zwei hundert vnd zwentzig guter guldin, der si gar vnd gantzlich mit voller zal von dem vorgenanten Steinkelr gewert vnd bezalt sint vnd an^b) ir guten nutz verkert hant, des si offenlich vor mir veriahen, der selb zehende lehen ist von den edeln fryen herren dien von Tengen⁴ von Eglisaw⁵ vnd Johans von Wilberg genant von Tossegg⁶, als den in phandes wise bracht hant zu Johans Steinkelrs handen von dien vorgenanten herren, als er vor mals och ir phand was, als die brief wisent vnd sagent, die dar vber geben sint, vnd also stunden die vorgenanten Johans Rordorf vnd Verena sin eliche husfrowe mit ym als mit ir rechten vogte fur gerichte an den stab verzigen vnd gaben da vor mir beidi fur sich vnd alle ir erben vff alles ir recht, so su hatten an dem vorgenanten zehenden mit aller zu gehorde, wie daz genant ist, an Vlrichs Eigendals hand zu des vorgenanten Johans Steinkelrs vnd siner erben handen mit mines des vorgenanten richters hand willen vnd gunst an den stab vnd mit gelerten worten, als gericht vnd vrteil gab, also daz si vnd ir erben den vorgenanten Steinkelr vnd sin erben an dem vorgenanten zehenden niemer bekumberen sumen noch angesprechen sond mit recht noch an^c) recht vff keinen gerichten noch ane gerichte, won su sich luterlich vnd gantzlich alles irs rechten enzigen hant aller gewer vnd inhans aller lehenschaft aller manschaft alles phandschillings vnd aller helffe geistlicher vnd weltlicher richter gerichten vnd rechtes, da mit si den egenanten Steinkelr oder sin erben iemer gesumen oder geschadgen mocht^d), vnd satzten den vorgenanten Steinkelr vnd sin erben in gewalt vnd in nutzlich gewer des vorgenanten zehenden vnd sich selber dar vs, vnd verzech sich die vorgenant Verena sunderlich ir morgengab heinstur vnd als irs rechten, so si an dem vorgenanten zehenden hatt, als si ir wirte vff daz vnd als sin gut besorget hatte, won su beidi noch ir deweders besunder vnd alle ir erben kein ansprach an den vorgenanten Steinkelr vnd sin erben noch an nieman von sinen wegen niemer me gehaben sond in keiner leig wis von des koffes vnd zehenden wegen, won si vergichtig waren, daz inen alles hoptgut vnd schad gantzlich gewert were vnd kein ansprach furbas haben sond weder vmb wort vnd werch, vnd lobten och, des vorgenanten zehenden recht wer ze sinne, wo des der vorgenant Steinkelr notturftig ist. Were och, daz kein brief iemer funden oder furgezogen wurde, der dem vorgenanten Steinkelr oder sinen erben schaden bringen mocht, die brief sond vernicht vnd tod sin. Vnd des ze warem vrkunde so han ich der vorgenant vogt, als vrteil gab, min insigel offenlich gehenkt an disen brief mir vnschadlich. Ich der vorgenant Johans Rordorf vergich fur mich vnd die vorgenant min elichen husfrowen einer warheit aller vorgeschriben dingen, vnd ze merer sicherheit so han ich fur mich vnd min elichen husfrowen in vogtes wise ^e) vnd alle vnser erben min eigen insigel offenlich gehenkt an disen brief. Der geben ist am nechsten donstag nach sant Jacobs tag nach Cristus geburte drutzehen hundert iar vnd dar nach in dem nunzigosten jare.