Ich^a) Jacob Rupreht, den man nempt der Low, stat amman ze sant Gallen¹ tun kunt vnd vergich offenlich mit disem gegenwurtigen brief allen, die in sehent lesent oder horent lesen, daz fur mich kam ze sant Gallen in der L stat an dem tag, alz dirre brief geben ist, do ich an des richs strâsse offenlich ze geriht sass, Johans Tengg Berhtolt Tenggen sun vnd offnot vnd veriach da der selb Johans Tengg offenlich frilich vnd willeklich vngebunLden vnd vngeuangen vor mir vnd dem geriht mit fursprechen von der vanknust wegen, alz in die frômen der burgermaister vnd der rat gemainlich der stat ze sant Gallen gehaimot gestraft vnd in iro L vanknust vnd banden hattent vmb das su in in zigen vnd in etwas schulden hattent, daran er sich etwas vber sehen vnd miss varn hett, won aber die selben der burgermaister vnd der rât gemainlich ze sant Gallen in durch got vor an durch siner frunde vnd durch vil ander erber lut ernstlicher bet willen vss der selben vanknust vnd banden ledig gelassen hettint, darumb so wolt er sich aller nachgeschribenn sache vnd dinge willeklich vnd gern verbinden, alz hie nach beschaiden ist an disem brief. Des ersten do swur der selb Johans Tengg offenlich vor mir in dem gerihte frilich willeklich vnd vnbetwungenlich vngebunden vnd vngeuangen gesunt lips vnd mutes mit guter vorbetrahtung ainen gelerten aid liplich zu got vnd ze den hailigen mit vf gehabenen vingern, vmb die vorgedahten vanknust straffung vnd getat der vorgedahten dez burgermaisters dez rates vnd aller burger gemainlich der stat ze sant Gallen vnd iro ieklichs besunder vnd mit namen aller dero, die an der selben siner vanknust schuld gehebt hant in dehain wis ald ratent ald helffent oder gehaft darzu gewesen sint, luter gantz vnd gut frund ze sinne vnd alle sin frund inen darumb ze frund ze gewinnen ân allen furzug vnd die selben vanknust straffung vnd getat niemer ze andenn noch ze aferrenn weder mit gaistlichem noch mit weltlichem geriht noch ân geriht weder mit worten noch werken noch in kain wise noch nieman andre an siner stat noch von sinen wegen ân alle geuarde vnd och wider die selben den burgermaister den rat vnd die burger alle gemainlich ze sant Gallen niemer ze sinne noch ze tunne in kain wis ân alle geuarde. Der selb Johans Tengg nam och do in den selben aide vnd swur, war daz er dehainer lay sach oder ansprachen zu den burgern gemainlich ze sant Gallen oder zu dehainem burger oder burgerinen besunder ze sant Gallen, es sien man oder frowen knaben oder tohtren, su sien ietz da selbs burger oder die hie nach da selbs burger werdent, vff disen huttigen tag, alz dirre brief ist geben, hetti oder hinnenhin iemer gewunne, wolt er darumb rehtes niht enbern, daz er danne ie darumb rehtes pflegen vnd reht von in nemen sol vnd wil ze sant Gallen in der stat vor irem geriht vnd niedert anderswa nach der selben stat reht vnd gewonhait, es war dann, daz er da selbs rehtlos gelassen wurd vnd daz och daz da kuntlich wurdi, so ist im behalten vnd in dem aide vss gelassen, daz er daz reht ie danne, von dem er danne also rehtlos gelassen ist ald der im dann da selbs wider hor worden war, anderswa suchen sol vnd mag, da es dann billich vnd muglich ist, ân geuarde. War aber, da vor got sie, daz er den vorgeschribenn aide iemer vber fur oder ieman andre an siner stat ald von sinen wegen an dehainem der vorgedahten stuken in dehain wis oder mit dehainen sachen, so sol der selb Johans Tengg den vorgedahten dem burgermaister dem rât vnd gemainer stat ze sant Gallen zwai hundert phunt phenning alles guter Costentzer munse ie zwen gut geng vnd genam haller fur ainen Costentzer phenning gantzlich verfallen sin ze gebenn nach der ersten vordrung ân allen furzug vnd ân alle widerrede, vnd hat och der selben gemainer stat ze sant Gallen darumb zu im ze merer sicherhait ze rehten burgen geben vnd gesetzt diz nachgenemten erberen lut den obgenanten Berhtolt Tenggen sinen vatter, Walthern Odler den man nempt Walti von Hof sinen ohain, Vlrich Tenggen genant der Kalbrer sinen vettern, Vlrich Tenggen den jungern, Hainrich Anderlin den smit, Eberharten Schirmer, Jacob Schirmer, Cunrat vnd Berh­tolt die Keller von Busenhofen² gebruder, Cunrat Kessler, Johansen Kamlin, Vlrich Toppelstain, Cunrat Widenhuber, Cunrat Hofstetter, Vlrich Studlin, Cunrat Schorant den satler, Johansen Schorant den jungern, den man nempt Osterrich, Cunrat List, Rudolffen, Vlrichen vnd Hainrichen die Kuchimarren gebruder, Johansen Tintzin, Rudolf Tanner, Berhtolt Veser, Hainrichen von Len³, Cunrat Maier den eltern, Cunrat Nagellin, Johansen von Ainswille⁴, Johansen von Sumbri⁵, Vlrich Furer vnd Vlrich Moken den smit, alle burger ze sant Gallen, die selben burgen hant alle vnuerschaidenlich mit im ieklicher besunder mit siner truwe willeklich vnd offenlich vor mir in dem gerihte gelobt in min hant zu gemainer stat ze sant Gallen handen also, beschach daz der selb Johans Tengg den vorgeschribenn aide iemer vber fur oder ieman von sinen wegen an dehainen vorgeschribenn stuken vnd artikeln in dehainen weg oder in dehain wis, daz su danne mit im gemainer stat ze sant Gallen der vorgeschribenn zwai hundert phunt phenning gantzlich gefallen vnd der selben gemainer stat ze sant Gallen gebunden vnd haft sin sont vnuerschaidenlich, daz selb gelt gantzlich ze gebenn vnd ze rihtenn ân allen furzug vnd widerred darnach inrent den nahsten drin manoten, vnd sont vnd mugent och danne nach den selben drin manoten die selben der burgermaister der rât vnd die burger alle gemainlich ze sant Gallen vnd iro ieklicher besunder vnd iro helffer, wer die sint, den vorgenanten Johansen Tenggen vnd sin erben vnd och die obgenanten burgen alle ald ieklichen besunder darumb phenden noten heften vnd an griffen an ligenden vnd an varenden gutern in stetten in dorffern vnd vff dem lande mit gaistlichem vnd mit weltlichem geriht vnd ân alles reht ân klag vnd ân zorn, wie vnd wa vnd wa hin su daz getun mugent ald in fugklich ist, alz vil vnd alz dik, vntz daz su der vorgeschribenn zwai hundert phunt phenning vnd och dez schaden, in den su vnd iro helffer von des selben phendens notens heftens vnd an griffens wegen koment, gantzlich gewert vnd vsgeriht vnd da von entschadgot werdent, vnd sol den obgenanten Johansen Tenggen noch sin erben noch die obgenanten burgen noch kain iro gut hie vor noch da wider niht gut sin weder babstlichs kayserlichs noch kunglichs geriht gewalt gesetzt gnâd frihait kain acht noch banne kain lantfrid kain buntnuss kain geselschaft kain burgreht kain gewonhait kain fund noch gesetzt, so ietz ist oder her nach funden gesetzt oder erdaht wurd von babsten kaysern kungen herren oder stetten noch enkainer lay ander sach schirm noch furzug, won su sich des alles verzigen hant, ez war danne, daz die obgenanten burgen den selben Johansen Tenggen danne inrent den vorgedahten nahsten drin manoten nach dem, so er vber varn hett, lebent oder tod ainem burgermaister vnd dem rât gemainlich ze sant Gallen geantwurtint gen sant Gallen in die stat in solichi band vnd gewalt, daz su sin sicher sint, so sont danne die selben burgen alle vmb daz vorgeschriben gelt vnd gelubt ledig vnd los sin. Vber diz alles hat sich der selb Johans Tengg dez offenlich vor mir vnd dem geriht willeklich gebunden, also war, da vor got sie, daz er ald ieman von sinen wegen die vorgeschribenn vanknust vnd getat iemer andoti oder aferti in dehain wis vnd den vorgeschribenn aid an dem selben stuk besunder iemer vber sach vnd vber fur mit dehainen sachen, wenn oder wa daz beschachi, daz danne der burgermaister der rât vnd die burger alle gemainlich der stat ze sant Gallen vnd iro ieklicher besunder vnd alle iro helffer den selben Johansen Tenggen an griffen haimen vnd vahen sont vnd mugent ân alles reht ân allen zorn vnd ân klag vff dem land in dorffern ald in stetten ald wa su in dann ankomen vnd ergriffen mugent, vnd daz su danne den selben Johansen Tenggen fur ainen schadlichen verschulten vertailten vnd verzalten man verderben vnd von dem lib tun sont vnd mugent ân alles reht vnd ân vrtail, vnd daz in da vor noch da wider niht schirmen sol enkain frihait noch gewonhait enkain reht weder gaistlichs noch weltlichs geriht kain gesetzt lantfrid noch buntnust der herren noch der stette enkain burgreht noch lantreht noch der stet reht noch enkainer lay ander sache schirm behelff noch furzug, won er sich des mit namen verzigen hat aller helf aller gnâden alles vszugs alles schirmes vnd alles des, da mit er sich wider die vorgeschribenn sachen vnd buntnuss iemer gesetzen ald da wider geredan oder gewerben kundi oder mohti in dehain wis. Vnd dez alles ze offem warem vrkunde vnd stater sicherhait aller der vorgeschribenn dinge vnd vergiht so han ich Jacob Rupreht amman da vorgenant von dez gerihtes wegen min insigel offenlich gehenkt an disen brief, won es och mit gemainer vrtail ertailt ward, daz ich es tun solt. Ich vorgenanter Johans Tengg vnd wir die obgenanten burgen alle Berhtolt Tengg, Walther Odler, Vlrich Tengg genant der Kalbrer, Vlrich Tengg der junger, Hainrich Anderlis, Eberhart Schirmer, Jacob Schirmer, Cunrat vnd Berhtolt die Keller gebruder, Cunrat Kessler, Johans Kamli, Vlrich Toppelstain, Cunrat Widenhuber, Cunrat Hofstetter, Vlrich Studli, Cunrat Schorant, Johans Schorant der junger, Cunrat List, Rudolf, Vlrich vnd Hainrich die Kuchimarren gebruder, Johans Tintzi, Rudolf Tanner, Berhtolt Veser, Hainrich von Len, Cunrat Maier, Cunrat Nagelli, Johans von Ainswille, Johans von Sumbri, Vlrich Furer vnd Vlrich Mok veriehent alle offenlich ain gantz warhait aller der dinge vnd gedinge, so von vns da vorgeschriben stat an disem brief, vnd des ze merer sicherhait so han ich vorgenanter Johans Tengg vnd och wir burgen Walther Odler, Eberhart Schirmer, Jacob Schirmer, Cunrat vnd Berhtolt die Keller von Busenhofen, Cunrat Kessler, Johans Kamli, Vlrich Toppelstain, Cunrat Widenhuber vnd Cunrat Hofstetter all vnseru aigenu insigel och gehenkt an disen brief, vnd won wir die andern burgen aigener insigel niht hattent, so haben wir vns willeklich gebunden aller vorgeschribenn dinge vnder dez obgenanten statammans Jacob Ruprehtz vnd vnder des ersamen Johansen Entziswillers dez vogtz ze sant Gallen insigeln, der selb vogt sin insigel durch vnser bett fur vns offenlich gehenkt hat an disen brief im vnd sinen erben gantzlich vnschadlich. Diz beschach vnd ward dirre brief geben ze sant Gallen in dem jar, do man zalt von Cristus geburt druzehenhundert jar vnd darnach in dem nunzigostem jâre, an dem nahsten mantag nach sant Jacobs tag dez hailigen zwelfbotten, der da kumpt imm howet.