Allen^a) den, die disen brieff ansehent oder horent lesen, kund ich Cunrat an dem Loew vnd vergich offenlich an disem L brieff, dz fur mich kam Adelhait von Schachen¹ vnd Hans ir elicher sun vnd offnetten da vor mir, wan si min aigen L sint von dem lip, si wolten sich entsichen des hoff vnd der lenschaft ze Schachen gar vnd gentzlich, was si nu vntz L her vnd och ir vordren ze lechen gehept hettin von dem gotzhus ze Wrmspach² mit aller zu gehort, an allain dz gutli, dz ir aigen ist vnd och ir vordren ze aigen gehept alweg hant, vnd hant sich och also des egenanten hoff mit siner zugehort entzigen vnd och an ir gewissen botten hand bruder Hans Apt aines conuersen ze Wetingen³ och mit somlichem geding, das die egenanten min frowen von Wrmspach den egenanten Adelhaiten von Schachen vnd Hansen ir sun gen sont funf pfunt gewonlicher pfenning Schaffhuser⁴ muntz vff den nechsten sant Martis tag vnd dannan hin vber ain jar aber funf pfunt och der muntz, als denn geng vnd gab ist, d[a]r^b) vmb dz die egenanten Adelhait von Schachen vnd Hans ir sun nu ze mal vnd och her nach vngesumpt vnd vngeirt lassen an dem selben vnserm hoff ze Schachen, vnd ze merer sicherhait so hand wir die eptischen vnd och der couent gemainlich ze rechtem burgen geben junhker Hartman von Jestetten⁵ sesshafft ze Eglisow⁶ vnd maijer Hainrich von Hochuelden⁷. Ich Hartman von Jestetten vnd ich maijer Haini von Hochuelden loben och, recht burgschafft vnd hafft ze sin vmb dz vorgenant gelt. Wir der couent gemainlich des gotzhus ze Wrmspach loben och, die egenanten burgen ledig vnd los ze machen von allem schaden^c). Vnd ze vrkund aller vorgeschribnen sachen han ich der egenant Cunrat am Loew min aigen insigel von ir aller ernstlicher bett wegen der burgen vnd och Ellinen von Schachen vnd Hansen ir sun offenlich gehenkt an disen brieff och mir vnd minen erben vnschedlich. Der geben wart in dem iar, do man zalt von gottes geburt drizehenhundert vnd nuntzig jar. Hie bi waren Eberhart Brumsi von Schaffhusen, den man nempt Gebur, vnd Hainrich Tutschlant vogt ze Ow⁸ vnd ander erber lut vil.