Allen^a) den, die disen brief ansehent lesent oder horent lesen, tund wir Johans, Herman, Hug vnd Beringer her HugLen^b) saligen von der Hohenlandenberg¹ ritters elichen sun kund vnd veriehent offenlich mit disem brief fur vns vnd L alle vnser erben, daz wir ain akker ist gelegen ze Wil² am graben, der vnser reht aigen gewesen ist vnd an wandet ze ainer L siten an Hans Buwillers akker vnd ze der andren siten an dez klainen hofs akker, den Arnoltswille hat, verkofft vnd aines ewigen iemer werenden koffes ze koffenn geben habent dem hohwirdigen fursten Cunen von gottes gnaden abt dez gotzhus ze sant Gallen³ vnserm gnadigen herren vnd dem selben gotzhus ze sant Gallen vmb ain pfunt pfenning Costenzer muns, der wir och gantzlich gewert sint, vnd habent och den selben akker fur vns vnd vnser erben dem selben vnserm gnadigen herren abt Cunen zu sinen vnd sines gotzhus handen braht vnd vff geben, alz reht sitt vnd gewonlich was vmb aigni guter ze tun, alz ez krafft vnd maht hat vnd haben sol vnd mag ietz vnd hienach, vnd den selben akker sollent vnd mugent sy nû hinnanhin vnd ewenklich fur reht aigen haben niessen besetzzen vnd entsetzzen an vnser vnd vnser erben sumen hinderren vnd widersprechen gantzlich, vnd dar vmb so haben wir vns enzihen vnd verzihent vns och mit disem brief fur vns vnd alle vnser erben aller aigenschafft aller lehenschafft aller kuntschafft aller besazzung aller gewer aller zugnust lut vnd brief aller vordrung vnd ansprach aller reht vnd rehtung, die wir zu dem vnd von dez vorgeschriben akkers wegen ie gehept haben ald hie nach iemer gehaben mohtin, alles gaistlichen vnd weltlichen gerihtez, da mit wir den vorgeschriben vnsern gnadigen herren abt Cun sin nachkomen vnd dz gotzhus an dem vnd von dez akkers wegen iemer me bekumberren ald bekrenken mohtin in dehainen weg. Wir habent och gelopt vnd lobant mit disem brief fur vns vnd alle vnser erben, dez akkers vnd dez koffes reht wern ze sint nah aigens reht fur aller mangklichs ansprechen gaistlicher vnd weltlicher lut vnd gerihtz vnd den selben vnsern gnadigen herren abt Cun sin nachkomen vnd daz gotzhus dar vmb ze versprechen vnd ze verstan allenthalben, alz dik sy dez notdurftig sint vnd bedurfent. Vnd ze warem vrkund aller vorgeschriber ding han ich Johans von der Hohenlandenberg da vorgenant her Hugen saligen von der Hohenlandenberg ritters elicher sun min aigen insigel fur mich vnd die obgenanten min bruder Herman, Hugen vnd Beringern vnd fur vnser erben offenlich gehenkt an disen brief, won die selben min bruder aigner insigel nut enhand. Geben ze Wil ze mittervasten in dem iar, do man zalt von Cristi geburt tusent druhundert vnd ains vnd nuntzig iar.