Wir^a) diz nâchgenempten Johans vnd Cristan von Kappel¹ gebruder Hainrichs von Kappel saligen êlichen sun tugint kûnt vnd veriehent L offenlich mit disem brieue fur vns vnd alle vnser êrben allen, die in sehent lesent oder horent lesen, von der zuspruch L wegen, die vnser vêtter salig Johans von Kappel bi sinem leben hatt zu êtwefil dez spittâls holtz ze sant Gallen² gelegen in L dem Rodmonten³, daz man nemmet der Wartbol⁴, vnd ainhalb stosset an Cunratz holtz von Êdlitswille⁵, vnd vns aber die selben recht der zuspruche dez ietzgedâchten holtzes von dem obgenanten vnserm vêttern saligen Johansen von Kappel an erstorben sint vnd geêrbt hant, daz sich da der selb ietzgenempt vnser vêtter salig Johans von Kappel, die wil er dennoht in leben vnd in libe waz, erkent hât vnd och wir dez sidermales von êrbern luten erinrot sint worden vnd daz och wir selber vns dez erkent hant, daz der selb vorgenempt vnser vêtter salig noch wir nie dehainu recht in dez vorgeschribenn spittâls holtz, daz man nemmet der Wartbôl, an dehainen stetten noch an dehainen ênden dez selben holtzes nie gehebt hant weder lutzel noch vil, vnd daz vns die êrbern wolbeschaidenn Bartholome Blârer, Vlrich Rudger vnd Vlrich Kochler phleger vnd maister dez vorgeschribenn spittâls durch fride vnd durch irn guten willen fur die selben zuspruche, die wir zu dem vnd an dem vorgedâchten dez spittâls holtz hattent vnd gehebt hant ald iemer mêr gehaben oder gewunnen mochtint, von dez selben spittâls wegen geben vnd gantzlich gewert siben phûnt guter vnd genger haller, die wir dâr vmb vnd dâ fur enphangen hant vnd da mit wir vnsern grossen schaden verkomen hant, vnd dâr vmb so haben wir den obgenanten dez spittâls phlegern vnd maistern baid vnuerschaidenlich mit vnsern truwen gelobt vnd lobent inen mit disem brieue fur vns vnd fur alle vnser êrben, daz wir noch vnser êrben noch niemant andre an vnser statt noch von vnsern wegen den vorgeschribenn spittâl noch dehain sin phleger noch besorger noch niemant andren von iro wegen von dez vorgeschribenn holtzes wegen noch von dehainer siner zugehorde wegen noch von dehainer recht noch zuspruche wegen, die wir zu dem an dem von dez selben ietzgedâchten spittâls holtzes wegen ald zu dehainer siner zugehorde ie gehebt hant vntz vff disen huttigen tag, alz dirre brief ist geben, ald nû hinnenhin iemer mêr gehaben oder gewunnen mochtint an dehainen stetten, niemer mêr sullent noch wollent ansprechen vftriben hinderren bekrenken bekumberren noch in dehain wise sûwmen noch ierren weder mit gaistlichem noch mit weltlichem gerichte noch ân recht noch mit dehainen andern sachen ân gefarde. Dârzu haben wir och baid vnuerschaidenlich willeklich mit vnsern truwen gelobt vnd lobent mit disem brieue fur vns vnd alle vnser êrben, den vorgeschribenn spittâl vnd sin phleger vnd besorger, wer die sint, von der vorgeschribenn zuspruche vnd von dez holtzes wegen, alz da vor beschaiden ist, ze versprechenn vnd ze verstanne ân allen iro schaden gen aller manglichem, wenn wo ald wie dik su dez notdurftig sint, ân gefarde. Vnd ze offenem wâren vrkunde vnd stater sicherhait aller dirre vorgeschribenn dinge vnd gedinge so haben wir obgenanten Johans vnd Cristan von Kappel gebruder, won wir aigener insigel nut hattent, vns baid willeklich gebûnden vnder dez êrbern wolbeschaidenn Walthers Schurphen insigel och burger ze sant Gallen, der daz selb sin insigel von vnser baider bette wegen fur vns vnd vnser êrben offenlich an disen brief gehenket hât, dez och ich ietzgenempter Walther Schurpf vergich mir vnd minen êrben gantzlich vnschadlich. Dirre brief wart geben ze sant Gallen in dem jâre, do von Cristi geburt warent druzehenhûndert jâr vnd dâr nâch in dem aim vnd nunzigosten jâre, an dem nahsten sampstag vor sant Georien âbent.