Allen^a) den, die disen brief ansehent lesent oder horrent lesenn^b), tun ich Vlrich von Lonberg¹ kund vnd vergich offenlich mit disem L brief fur all min erben, das Cunrat Eglolf ze Wil² sesshafft, der min vnd Ludwigs³ mins bruder reht aigen was von dem lib, L sich selber von vns baiden vnd vnsern erben mit lib mit gut vnd mit aller zugehord an das erwirdig gotzhus ze sant Gallen, L dannen er och vnser lehen gewesen ist, aines rehten ewigen vnd vnwiderruffenden koffes gekofft hat vmb vierdhalb pfund pfenning Costentzer muns ald aber zwen geng gut haller fur ain Costentzer pfenning, derselben pfenning ich och von im gantzlich gewert bin vnd enpfangen han. Vnd den selben Cunrat han ich fur mich vnd an statt des vorg(enanten) Ludwigs mins brudern mit lib mit gut vnd mit allen rehten dem hohwirdigen fursten Cun von gottes genaden abt des gotzhus ze sant Gallen⁴ minem gnadigen herren an sin hand zu des vor(genanten) gotzhus handen vff geben vnd geuertgot vnd zu sinen handen braht vnd in in nutzlich gewer gesezt, alz reht sitt vnd gewonlich was, vnd also, das der selb Cunrat nû hinnanhin mit lib mit gut vnd mit aller zu gehord zu dem vor(genanten) gotzhus ze sant Gallen gehorren sol, vnd darvber so han^c) och verzigen vnd enzih mich mit disem brief fur mich vnd den vorg(enanten) Ludwig minen bruder vnd all vnser erben gen dem vorg(enanten) minem herren abt Cunen gen sinen nahkomen vnd gen dem vor(genanten) gotzhus ze sant Gallen vnd och gen dem vorg(enanten) Cunrat Eglolfen^d) sim lib vnd sim gut aller aigenschafft aller lehenschafft aller gewer aller besazzung aller kuntschafft aller zugnust lut vnd brief, die ich ald min bruder ietz hand oder in kunftigen ziten von vns ald vnsern erben funden wurden, alles gaistlichen vnd weltlichen gerihtes aller vordrung vnd ansprach, so ich ald der vorg(enant) Ludwig min bruder oder vnser erben zu dem vorg(enanten) Cunrat Eglolf zu sinem lib vnd gut iemer me gehaben vnd gewinnen mohtin von dehainrlay sach wegen an geuerd. Ich han och gelopt vnd loban mit disem brief fur mich vnd Ludwig minen bruder vnd fur all vnser erben, des vorg(enanten) Cunrat Eglolfs mit lib vnd gut vnd des koffs reht wern ze sint nah reht fur aller mangklichs irrung vnd ansprach gaistlicher vnd weltlicher lut vnd gerihtz an allen den stetten, da es dz vor(genant) gotzhus vnd der selb Cunrat notdurftig sint, an all geuerd. Vnd des ze warem vrkund han ich Vlrich von Lonberg da obg(enant) min aigen insigel fur mich vnd min erben offenlich gehenkt an disen brief. Ich Ludwig von Lonberg da obgen(ant) vergich offenlich mit disem brief fur mich vnd all min erben, was da der obgen(ant) Vlrich min bruder an disem brief veriehen verschriben vnd getan hat, dz diz alles min will vnd gunst ist, vnd darvmb dz diz alles von mir stat vnd war belib ietz vnd hienah, so han ich min aigen insigel fur mich vnd all min erben ze ainr zugnust diser ding offenlich gehenkt an disen brief. Der geben ist an dem ahtonden tag des haligen tags ze ostran, do man zalt von Cristi geburt tusent druhundert vnd nuntzig jar.