Wir^a) Burkart von gottes gnaden byschoff ze Costentz² tunt kvnd vnd vergehen des offenlich an disem brief allen, L die in ansehent oder horent lesen, daz vns der erber manne Hainrich Kappeller von sant Gallen vff gesendet hât L an vnser hand daz zehendli, daz im gegangen ist vss der erwirdigen herren hoff ze Thatenwiller³ des tegans vnd L des cappittels gemainlich ze dem thum ze Costentz, daz selb zehendli sin lehen ist von vns vnd dem gotzhus ze Costentz, vnd batt vns flehklich an sinem brief, daz wir daz selb zehendly von im vff nemen woltent vnd es den obgenanten herren vnd dem cappittel aignen woltent, won si och daz von im koft hettent vmb ahtzehen pfunt vnd drye schilling Costentzer pfenning, vnd war och der gantzlich von inen gewert vnd an den selben stunden, do batent vns die obgenanten herren von dem cappittel ze Costentz, daz wir inen daz selb zehendli aignen woltent, won es inen komenlich war zu dem hoff, der och ir aigen ist. Der bett haben wir si gewert, won vns daz redlich dvnkt, vnd habent den selben zehenden von dem selben Hainrich Kappeller vff genomen an vnser hand vnd habent mit bedahtem mut dem vorgenanten cappittel ze dem thum ze Costentz vnd iren nachkomen daz vorgenant zehendli vnd allu die reht, die wir daran habent von lehenschaft wegen, vff geben an ir hand vnd habent inen daz geaignet mit disem brief, won vns daz gotlich dvnkt, vnd habent vns daruber verzigen vnd verzihent vns willeklich mit disem brief fur vns vnd vnser nachkomen gen inen vnd gen iren nachkomen als vnsers rehten vorderung vnd ansprach, so wir an dem selben zehendlin von lehenschaft wegen oder von ander sach wegen gehebt habent oder iemer daran gewinnen mohtent. Vnd des alles ze warem vnd offem vrkvnd geben wir vorgenanter byschoff Burkart von Costentz vnser insigel an disen brief. Der ist ze Costentz geben, do man von Cristes geburt zalt druzehenhundert jar, darnach in dem ain vnd nuntzigosten jar, an dem nahsten zinstag vor sant Georyen tag.