Allen^a) den, die disen brief ansehent lesent oder horent lesen, kund ich Johans Mayger von Rânwille¹ Vlrich Maygers salgen êlicher L sun von Ranwille vnd vergich offenlich mit disem brieue fur mich vnd fur alle min erben, daz ich mit wolbedahtem mut mit L guter vorbetrahtung nach miner frunde vnd nach ander erber lut rat mit Hainrichen Mayger dem smit minem êlichen L bruder wonhaft ze sant Gallen lieplich tugenlich vnd fruntlich getailt han gantzlich vnd gar alles daz erbe vnd erbschaft vnd alles ander ligent vnd varent gut, daz ich mit im ze tailenn gehebt han vntz her vff disen huttigen tag, alz dirre brief ist geben, ez war von dem obgenanten vnserm vatter salgen ald von vnser muter ald wie ez dar komen ist, was daz ist, wa es gelegen ist ald wie ez genemt ist, des selben mines tailes ich och gantzlich vnd gar von im gewert vnd bezalt bin, also daz der selb Hainrich Mayger min bruder noch sin erben mir noch minen erben bi dem selben taile noch von des selben mines tailes wegen niht mer schuldig sint noch gelten sont noch wider geben, vnd darumb so han ich mich verzigen gen dem obgenanten Hainrich Mayger minem bruder vnd verzich mich mit vrkund diz brieues gantzlich vnd gar fur mich vnd fur alle min erben aller der reht vordrung vnd ansprachen gaistlichs vnd weltlichs gerihtes, so ich mit im ald zu im von tailes von gemainde von erbes oder von erbschaft wegen ligendes oder varendes gutes, ez war von dem obgenanten vnserm vatter salgen ald von vnser muter ald wie es dar komen ist, ie gehebt habent vntz her vff disen huttigen tag, alz dirre brief ist geben, ald hie nach iemer gehaben oder gewinnen mohtint vntz an ain anfallend erbe. Ich han och willeklich gelobt bi guten truwen vnd loben mit disem brief, daz ich noch min erben noch nieman andre an vnser stat noch von vnseren wegen den obgenanten Hainrich Mayger minen bruder noch sin erben, ob er enwar, darumb niemer sullent noch wellent an sprechen vf triben bekumberren bekrenken noch in kain wis beswaren weder mit gaistlichem noch mit weltlichem geriht noch ân reht noch mit enkainer lay ander sach ân alle geuarde, ez war dann, daz mich von anfallender erbe wegen iht an viel vnd an ersturb, daran sol mir daz vorgeschriben verzihen gantzlich vnschadlich sin an allen gerihten vnd an allen stetten. Vnd des alles ze offem warem vrkunde vnd stater sicherhait aller der vorgeschribenn dinge vnd vergiht so han ich Johans Maiger da vorgenant erbetten den beschaidenn Vlrich in der Owe burger ze sant Gallen, daz er sin insigel fur mich vnd alle min erben offenlich gehenkt hat an disen brief, vnder dez selben insigel ich mich willeklich gebunden han, won ich aigens insigels niht han, des och ich obgenanter Vlrich in der Ow offenlich vergich an disem brief mir vnd allen minen erben gantzlich vnschadlich. Diz beschach vnd ward dirre brief geben ze sant Gallen an dem nahsten mantag nach sant Georien tag in dem jar, do man zalt von Cristus geburt druzehenhundert jâr vnd darnach in dem ainen vnd nunzigostem jare.