Wir^a) dis nachgen(emten) Herman vnd Vlrich von Landenberg von Griffense¹ sesshaft ze Bichelse² gebruder veriehen vnd tunt kund allermenglichem mit disem L brief, daz wir baid gemainlich wissentklich vnd wolbedahtklich fur vns vnd fur alle vnser erben redlich vnd recht verkoft haben die L erberen frowen Adelhaiten wilent Walther Baldizz elichen tohter Haini Juchlingers von Balterswille³ elichi wirtenn mit lib vnd mit L gut vnd mit allen rechten nutzen vnd zugehorden, die vnser lehen was von dem hohwirdigen fursten vnserm gnadigen herren abt Cunen von gottes gnaden des gotzhus ze sant Gallen⁴ vnd von demselben sinem gotzhus, vnd haben ze koffent geben den erwirdigen gaistlichen herren abt Johansen von gottes verhengnust vnd gemænem couent des gotzhus ze Vischinan⁵ sant Benedicten ordens in Costentzer bystum vnd allen iren nachkomen zu desselben gotzhus handen vmb aht pfund pfen(ning) alles guter vnd genamer Costentzer muns, dero wir och aller gantzlich vnd gar nach vnserm nutz vnd willen von inan bezalt syen. Vnd haben inan dieselben ffrowen mit aller zugehord fur vns vnd fur alle vnser erben ledklich vnd ffrilich vffgeben vnd fur recht aigen zu ires gotzhus handen bracht vnd geuertgot mit des obgenanten abt Cunen vnd mit gemaines capitels des gotzhus ze sant Gallen handen gunst vnd willen, alz recht sitt vnd gewonlich was, wan wir och dieselben vnser gnadigen herren abt Cun vnd daz capitel des obgenanten gotzhus ze sant Gallen mit ernstlicher bett erbetten haben, daz su sich der lehenschaft an der obgenanten ffrowen gegen dem obgenanten gotzhus ze Vischinan verzigen vnd dieselben ffrowen demselben gotzhus geaignot hant, vnd haben och wir vns baid ledklich vnd ffrilich gegen dem obgenanten abt Johansen vnd gemainem couent des gotzhus ze Vischinan vnd gegen demselben gotzhus verzigen vnd verzihent vnd entwerent vns och redlich vnd recht mit disem brief aller aigenschaft aller lehenschaft aller manschaft aller gewer aller besatzung aller kuntschaft aller zugnust lut vnd briefen aller dienst aller vall vnd gelazz alles erbes vnd erbtailes alles rechten aller rechtung aller vordrung vnd ansprachen, so wir ald vnser erben zu der obgenanten ffrowen mit lib vnd mit gut vnd mit aller zugehord ie gehattent ald hernach iemer mer gewinnen mohtint von recht ald von gewonhait ald von dehainerlay andren sach wegen, so ieman erdenken kan, an geuard. Wir sollent vnd gelobent och bi guten truwen mit disem brief fur vns vnd fur alle vnser erben, der obgenanten ffrowen mit aller zugehord vnd dis kofs der obgenanten abt Johansen vnd gemaines couents des gotzhus ze Vischinen vnd aller iro nachkomen vnd desselben ires gotzhus gen allermenglichem vf gaistlichen vnd vf weltlichen gerichten, wenn wa ald wie dik si ald ir gotzhus ald die obgenant ffrow des noturftig sint ald dar vmb mit dem rechten vf getriben ald angesprochen werdent, recht wern ze sint nach dem rechten vnd nach des landes sitten vnd gewonhait an geuard. Vnd des alles ze offem vrkund der warhait so haben wir obgenanten Herman vnd Vlrich von Landenberg baid vnsru insigel offenlich gehenkt an disen brief. Der geben ist an dem nahsten samstag nach vnsers herren ffronlichams tag, do man zalt von Cristus geburt druzehenhundert vnd nuntzig iar, dar nach in dem ersten jar.