Ich^a) Johans Entziswiller vnder vogt ze sant Gallen¹ tun kunt vnd vergich offenlich mit disem brief allen, die in sehent lesent oder hoLrent lesen, daz fur mich kament ze sant Gallen in der stat an dem nahsten fritag nach sant Mychels tag, do ich von des L hailigen Romschen richs wegen an des richs strasse offenlich ze geriht sazz, der beschaiden kneht Johans Hârth, den man L nempt Hauelli, burger ze Wangen² an ainem tail vnd Haintz Stamler von Vlm³, den man nempt Tufel Haintz, ze dem andern tail, vnd stalten sich da die selben baid tail mit fursprechen offenlich vor mir vnd dem geriht, vnd klegt da der vorgenant Johans Hârth mit fursprechen offenlich vor mir an gemainem geriht zu dem obgenanten Haintzen Stamler, der fur ainen schadlichen man von robes wegen fur mich an offen geriht gebunden vnd geuangen gefurt vnd geantwurt ward, daz der selb Haintz Stamler, der da ze gegen stunt, dem vorgenanten Johansen Hârthen vnd dem lande ain schadlicher man war von robes wegen vnd daz er ain samlich schadlicher man war, daz man von siner misstat wegen billich vber sinen lip rihten solt. Wa aber der selb Haintz Stamler der selben klag vnd ansprach vergessen vnd ab red sin wolt, das wolt der vorgenant Johans Hârth wisen, alz reht war, vnd bat mich darumb gerihtes hin zu im. Do bat mich der obgenant Haintz Stamler mit sinem fursprechen ze eruarn an ainer vrtail, sid das im du klag an sin leben vnd an sinen lip giengi, ob man in danne iht billich des ersten enbinden solt. Daz ward im mit rehter vrtail ertailt, vnd doch also das man in von des gerihtes wegen in samlicher hut vnd gewarsami haben solt, daz er dem geriht niht abswiff wurd vnd daz dem vorgenanten kleger Iohansen Hârthen daz reht von im wider fur, alz er zu im geklegt hett. Vnd do der selb Haintz Stamler also nach rehter vrtail enbunden stunt, do antwurt des der ietzgenant Haintz Stamler mit sinem fursprechen vnd sprach, er war vnschuldig, alz der vorgenant Iohans Hârth zu im geklegt hett. Vnd nach des vorgenanten Johansen Hârthen klâg vnd nach des obgenanten Haintzen Stamlers widerred vnd antwurt do fragot ich vorgenanter vogt vrtail vmb vnd ward ertailt mit gemainer vrtail, wa der vorgenant Johans Hârth gesweren moht vnd och swur ainen gelerten aid ze den hailigen, das der obgenant Haintz Stam(ler)^b) im vnd dem land ain schadlich man war von robes wegen, alz er geklegt hett, vnd darzu sechs erber vnuersprochen man bi im hett, die gesweren mohtint vnd och swurint, daz der aid, den er gesworn hett, rain war vnd niht main, das er des geniessen solt vnd der obgenant Haintz Stamler des engelten solt. Vnd do der vorgenant Iohans Hârth vnd sin gezugen mit im des vor mir vnd dem geriht sweren wolten gelert aid, alz ertailt waz, do erkant sich der selb Haintz Stamler willeklich vnd vnbezwungenlich offenlich vor mir an gemainem geriht vnd sprach, alz der obgenant Iohans Hârth zu im geklegt hett, des war er laider schuldig vnd hett den tod wol verschult vnd wolt darumb nieman lassen sweren durch siner sel nutz vnd hailes willen vnd erliess do in vnd sin gezugen willeklich vnd offenlich der selben aiden, als su vber in wolten gesworn han. Vnd nach der selben vergiht do bat mich der egenant kleger Iohans Hârth mit sinem fursprechen eruarn an ainer vrtail, waz nv reht war. Daz tet ich vnd ward ertailt mit gemainer vrtail, daz ich von des gerihtes wegen den obgenanten Haintzen Stamler dem nachrihter beuelhen vnd antwurten solt, vnd daz im der sin hende binden vnd zwai stuk vsser sinem lip machen solt, also daz sin hopt das kurtzer tail sin solt. Vnd do daz beschach vnd ertailt ward, do bat mich der vorgenant kleger Iohans Hârth mit sinem fursprechen eruarn an ainer vrtail, ob daz wari, daz in ieman vechti oder beschadgoti von der klag vnd von des obgenanten Haintzen Stamlers todes wegen oder ieman andre, die mit raten oder mit getaten hainlich oder offenlich darzu geraten oder geholffen hettint, waz dann darumb reht war, daz ich och tet, vnd ward nach miner frage ertailt mit gemainer vrtail, beschach daz ieman, wer die warint ald wie su genant warint, den obgenanten Iohansen Hârthen oder ieman andre, wer die warint, die mit raten oder mit getaten schuld hettint an des obgenanten Haintzen Stamlers vanknust vnd tode vnd darzu geraten oder geholffen hettint, vechtint oder schadgotint an iro lip oder an iro gut, wa man den oder die, die daz getan hettint ald tatint, ergriffi, das die in den selben schulden stan vnd vertailt lut sin soltint, alz der obgenant Haintz Stamler stund vnd waz, do er dem nachrihter mit vrtail geantwurt vnd beuolhen ward. Vnd des alles ze offem warem vrkunde vnd stater sicherhait aller der vorgeschribenn dinge vnd vergiht so han ich Iohans Entziswiller vogt da vorgenant von des gerihtes wegen min insigel offenlich gehenkt an disen brief, won es och mit gemainer vrtail ertailt ward, daz ich es tun solt. Diz beschach vnd ward dirre brief geben ze sant Gallen an dem vorgeschribenn fritag in dem jar, do man zalt von Cristus geburt druzehenhundert jar vnd darnach in dem ainen vnd nunzigostem jare.