Wir dis nachgeschriben vogt schulth(ei)s vnd ratt vnd burger gemeinlich rich vnd arm der stett Winthertur¹, Diessenhofen², Frowenueld³, Ratolfzell⁴, Zouingen⁵, Bremgarten⁶, Surse⁷, Mellingen⁸, Lentzburg⁹, Waltzhut¹⁰ vnd Sekingen¹¹ tund kunt vnd vergechent offenlich mit disem gegenwurtigen brief fur vns vnd all vnser nachkomen, als vnser guten vnd lieben frund die schultheiszen die ratt vnd burger gemeinlich rich vnd arm der drier stett Arow¹², Baden¹³ vnd Brugg¹⁴ mit vnser aller rat vnd von vnsers heissens wegen sich verbunden hand vnd gangen sind hinder vnser aller guten frund den vogt die ratt vnd burger gemeinlich der statt ze Rappreswil¹⁵ vmb dis nach geschriben schuld, als dz eigenlich hie nach vermerkt ist, beidu hoptgut vnd och der zins, so man jarlich da von geben mus, des ersten hern Heinrichen von Masmunster¹⁶ schulherr der stift ze Basel in namen vnd an statt vro Agnes Cunratz ze der Sunnen elichu frow Jacobs Zibollen tochter ze Basel vmb zwelf hundert guldin, da von man jerlich geben muß hundert guldin zins, item gen hern Johansen Heber von Mulhusen¹⁷ ritter in e stur wiz in namen vnd an statt vro Greden hern Vlrichs von Durnnach¹⁸ genant Gutterolf ein ritters elichu frow vmb dru hundert vnd achzig guldin, des XXX guldin^a) zins gein gen dem selben her Johansen Heber von Mulhus ritter vmb vier hundert vnd zechen guldin hoptgutz, da von man jerlich geben mus drissig vnd funf guldin ze zins, item gen dem fromen vnd bescheiden junker Herman von Ramstein einem edlen knecht her Vlrichs seligen sun von Ramstein¹⁹ vmb dru hundert guldin hoptgutz vnd vmb zwentzig vnd funf guldin, die man jerlich da von zins geben mus, vnd gen dem wisen vnd bescheiden meister Mathisen von Trier einem juristen ze Basel vmb dru hundert guldin hopgutz, da von man jerlich och zwentzig vnd funf guldin zins geben mus, summa des hopgutz ist zwei tusent sechs hundert zechen guldin minder vnd der zins zwey hundert nunzechen guldin, als die brief wol wisent, die dar vmb geben sind. Sol man wissen, dz die selben obgenanten dry stett Arow, Baden vnd Brugg das mit solicher bescheidenheit vnd rechten geding getan hand, als dz hie nach eigenlich begriffen ist. Des ersten, were dz die vorgenanten von Rappreswil die vorgenanten zins nit jerlich all vnd besunder richten werten vnd bezalten vff die zil vnd tag, als si denn tun sullend vnd ir briefe, so die selben von Rappreswil vnd die von Arow, Baden vnd Brugg mit in geben hand, wol wisend vnd sagent, wurden denn die selben vnser guten frund Arow, Baden vnd Brugg oder ir nachkomen dar vmb gemant oder dz si leisten musten oder dhein schad vff si gan wurd, des si oder ir nachkomen von derselben manung vnd leistung oder sus von ander sach wegen, wie sich dz denn heist, ze dheinem schaden iemer komen, es were von zerung von clag von bottenlon wegen rittend oder gand ze senden vnd gen den egenanten von Rappreswil ze werbenne, vnd wie die zins gewert ander burgen vnd mitgelten gegeben werden ald wor vmb denn jemer gemant wirt, als dik dz ze schulden kumpt, alwend iren worten vmb allen schaden bi guten truwen vnd an ander bewisung ze geloben, sullen wir in helfen tragen widerkeren vnd ablegen, als dz zitlich billichen vnd muglichen ist vnd wir in och gelopt vnd verheissen hand, vnd wenn die selben schultheis der vorgenanten stett Arow, Baden vnd Brugg des nit lenger noch furbasser beiten noch vßligen wellen, so sullen si zu inen beruffen vnd manen. Ein schultheis vnd ein des ratz von Winthertur vnd von Zouingen die selben sullent denn an allz verziechen zu in komen, in welch statt oder vf welen tag in denn von in verkunt vnd enbotten wirt. Darzu sullend och die schultheis von Arow, von Baden vnd von Brugg jeclicher ein vß irem rat mit im vnd^b) zu im^c) nemen, die egenanten funf schultheis vnd die funf der raten sullent denn ze samen sitzen vnd eigenlich vberslachen, was hoptgutz zins schad oder geltz dennocht vss stand oder sin die selben dry stett all stett gemeinlich besunder oder die iren schaden enphangen oder genomen haben klein oder groß, als dz ieder schultheis vnder in vnd vnder vns allen von siner statt wegen bi sinem eid, so er vnser herschaft von Osterr(ich) vnd siner statt getan hat, behept an all geuerd, den selben schaden, so sich denn also vindet vberal mit sampt allem hopgutz zins oder schaden, so dennocht vss stund, sullent denn die funff schulthessen vnd die funf rat der statt Arow, Baden, Brugg, Winthertur, Zouingen vnder sich selben vnd vnder vns gentzlichen an legen vnd slachen vff ie die statt, als si denn dunkt, dz ie die statt geben vnd getagen^d) mug bi iren truwen vnd eiden, als man etwenn mer semlich gelt vnder vns an geleit hat an geuerd, wz och also von in vf si vnd vns geleit wirt, dz sol ie die statt war vnd stett haben gentzlich volfuren vnd da wider nit sin noch reden^e) noch schaffen getan in dhein weg, vnd sunderlich so sullent si dz selb gelt bi guten truwen vff ein tag geben, als denn von in berett wirt, welch statt aber vnder in oder vnder vns des sumig were ald da wider redt oder tat, wz schadens denn vff so vil geltz gat oder man sin schaden enphacht ald nimpt, den selben schaden allen sol denn die selb statt, ir syj eini oder mer, gar vnd gentzlich vstragen an vnser aller stett schaden, so denn ir gelt vnd anzal geben hett, dar zu sullend vnd mugend wir die andren stett vnd wer vns des helfen wil die selben stat, ir si eini oder mer, ir lut vnd gut vnd all ir burger vnd der selben luten lip vnd gut dar zu halten vnd wisen mit noten mit pfenden vnd angriffen in stetten oder vff dem land, wie vns dz fugt, als lang als dik vnd als vil, vntz dz si ir an zal des geltz vnd des schadens, so nach dem tag dar vff geluffen wer, wie sich denn der schad hiesch, es si von zerung von clag von bottenlons wegen oder von des angriffens wegen gangen wer, gentzlich vnd gar an vnser vnd aller vnser nachkomen schaden gar vnd gentzlich vstragen vnd bezalt wirt an all geuerd. Vnd sol och dhein statt vnder vns noch inen, die dis sumig weren, noch vnser burger noch ir lip lut noch gut noch der selben luten lip noch gut vor dem selben pfenden noten vnd angriffen nit schirmen kein recht geistlichs noch weltlichs kein friheit noch gnad der herren noch der stett sunder vnser herschaft von Osterrich noch ir stett recht, so wir ietzunt erworben vnd vns geben sind oder vns noch geben mochten werden, damit wir oder dhein statt besunder sich verantwrten oder wider disen brief vnd alles, so er meldet, reden getun ald sich in dheinen sachen gehelffen mocht mit geuerd oder an geuerd. Wir die vorgenanten vogt ratt vnd burger gemeinlich vnd besunder derselben stett Winthertur, Diessenhofen, Frowenueld, Rattolfzell, Zouingen, Bremgarten, Surse, Mellingen, Lentzburg, Waltzhut vnd Sekingen vergechent och mit disem brief fur vns vnd all vnser nachkomen, dz wir alle die stuk artikel vnd geding, so diser brief meldet vnd hie vor von vns an disem brief geschriben stand, gesworn hand liplich zu den heilgen mit vf gehepten handen vnd gelerten worten, war vnd stet ze haben vnd gentzlich ze volfuren vnd da wider nit reden noch tun noch schaffen getan in dhein weg an all geuerd, also dz vns die vorgenanten stett Arow, Baden vnd Brugg halten leisten vnd volfuren, dz si vns versprochen hand vnd billich tun sullend. Vnd des ze einem offenn waren vrkund vnd rechter vergicht aller vorgegeschribner^d) sach vnd geding so haben wir die vorgeschriben einliff stett^f) all vnd jeclichu besunder ir statt ­eigen insigel offenlich gehenkt an disen brief. Der geben ist ze Baden in Ergow nach Cristus geburt druzechen hundert vnd nuntzig jar, darnach in dem ersten jare, vigilia Andree apostoli.