Wir^a) Cun von gotz gnaden abt vnd das cappitel gemainlich des gotzhus zu sant Gallen¹ sant Benedicten ordens in CosteLntzer bystum bekennen vnd tunt kund offenlich mit disem brief, alz der durchluhtig hochgeborn furst hertzog Lupolt hertzog L ze Ostenrich², ze Styr, ze Kernden vnd ze Krain, graff ze Tyrol etc. vnser lieber gnadiger herr fur sich sin vettern vnd bruder L vns vnd vnser gotzhus ze sant Gallen mit allen vnsern vestinen stetten lendern luten vnd guten in ir sunder gnad dienst vnd schierm genomen hat zu dem rechten, also dz si vnd ir landuogt vnd amptlut in Thurgow, Argow vnd in ir herschaft ze Veltkilich³, wer die ie ze ziten sint, vns mit iren vestinen stetten land vnd luten daselbs beholfen vnd beraten sin sullent zu allen vnsern notturften vnd vns vnd die vnsern gen menglichem versprechen sont zu dem rechten, wenn wir oder die vnsern das vordrent vnd des bedurfent, vngeuarlich. Dar vff ôch wir egenempter abt Cun ietzo derselben vnser herschaft gesworner rât vnd diener worden sint. War aber, dz wir vns zu ieman anderm verbinden wurdint, dar inne sullen wir dieselben vnser herschaft von Ostenrich vssnemen vnd vorbehalten. Vnd haben och har inne vssgenomen den hailgen stul ze Rom vnd daz hailig Romsch rich vnd alle ander, die sich vor zu vns verbunden hant, wie die genant sint, an geuard. Vnd sullen och wir zu glicher wis der obgenanten vnser herschaft von Ostenrich vnd den iren mit allen vnsern vnd vnsers gotzhus vestinen stetten luten vnd lendern vestenklich vnd getruwlich dienen behulfen beraten vnd wartent sin zu allen iren notturften, wenn si oder die iren daz an vns vordrent vnd des bedurfent, an geuard. War aber, daz dieselb vnser herschaft solich hoptkrieg vnd landkrieg gewunnen, dar zu si vnser ald der vnsern ze landwêr bedorften, so sont si vns dar vmb tun, alz ir vordern vnsren vordern getan hant. Vnd sol disi buntnust verainung vnd dienst an alles absagen bestan vnd weren, alle die wil wir obgenanter abt Cun in leben sint, vnd nach vnserm abgang vntz an ain absagen, dasselb absagen vnsri obgenant herschaft von Ostenrich ald vnser nachkomen ald ain gemain cappitel vnsers obgenanten gotzhus nach vnserm tod wol tun mugent, wenn si wend. Vnd wenn ôch dasselb absagen von ainwedrem tail geschiht, so sol die egeschriben buntnust verainung vnd dienst dar nach ain halb iar das nahst bestan vnd weren vnd nit furbaz an geuard. Besigelt ze vrkund mit vnsrer abtye vnd cappitels insigeln vnd geben ze Wil⁴ in vnsers gotzhus statt an dem nahsten zinstag nach sant Anthonien tag nach Cristz geburt druzehenhundert iar, dar nach in dem zwai vnd nuntzigosten jar.