Bonifacius etc. Venerabili fratri episcopo Tudensi¹ et dilectis filiis abbati monasterii in Campidona² Constanciensis diocesis ac decano ecclesie Constanciensis salutem etc. Exhibita nobis nuper pro parte dilecti filii Johannis de Lochen³ rectori parrochialis ecclesie in Lyndow⁴ Constanciensis diocesis peticio continebat, quod olim ipse in causa per eum contra dilectum filium Vlricum Burgower⁵, qui se gerit pro presbitero dicte diocesis super dicta parrochiali ecclesia, de qua tunc certo modo eidem Johanni auctoritate apostolica eidem Johanni canonice^a) provisum fuerat et quam dictus Vlricus detinebat indebite occupatam mota et in palacio apostolico coram diversis auditoribus causarum eiusdem palacii ex commissionibus apostolicis diucius ventilata tres pro se et contra prefatum Vlricum, per quas dicta ecclesia Johanni adiudicata et super ea Vlrico prefatis perpetuum silentium impositum extitit, diffinitivas sentencias reportavit et super execucione huiusmodi sentenciarum nostras ad nos sub certa forma litteras impetravit. Cum autem, sicut eadem peticio subiungebat, dictus Johannes dubitet, quod predictus Vlricus processibus super hiis per nos factis et fiendis contumaciter parere non velit, pro parte dicti Johannis nobis fuit humiliter supplicatum, ut providere sibi super hoc de oportuno remedio dignaremur. Nos itaque huiusmodi supplicationibus inclinati discretioni vestre per apostolica scripta mandamus, quatenus vos vel duo aut unus vestrum per vos vel alium seu alios legitimis super hiis habitis servatis processibus eos quociens expedierit auctoritate nostra aggravetis invocato ad hoc, si opus fuerit, auxilio brachii secularis. Contradictores per censuram etc.^b) Non obstante si eidem Vlrico vel quibusvis aliis communiter vel divisim a sede apostolica sit indultum, quod interdici suspendi vel excommunicari non possint per litteras apostolicas non facientes plenam et expressam ac de verbo ad verbum de indulto huiusmodi mencionem. Datum Rome apud sanctum Petrum sexto kl. februarii anno tercio. N XII de Ben^to.