Ich^a) Vlrich Bettler von Herdern¹ vergih vnd tun kund allermenlich mit disem L brief, als ich dem fromen vesten herr Hainrichen von Eppenberg² ritter ainen L vnd vierzig guter guldin recht vnd redlich schuldig ward vnd gelten solt, vmb L das selb gelt ich Cunraten von Eppenberg³ sinem bruder ze ir baider handen die muli ze Herdern, die min aigen gewesen ist, vnd die wis, die man nempt Wibilos⁴, vor etwa uil zites ze Frowenuelt⁵ in der statt vor offem gerichte recht vnd redlich ze koffen geben vnd och gegeuertget han, also das ich oder min erben die selben muli vnd die wis mit ain vnd vierzig guter guldin wider koffen mugint doch vngeuarlich nach des landes recht, von der selben muli vnd der wis ich oder min erben den vorgenanten baiden von Eppenberg vnd iren erben jerlich vff sant Martis tag vier mutt kernen ze rechtem zins geben sullent gutes vnd genemes Frowenuelder mess, bi den selben zinsen ich inen nach rechnung funf phunt guter haller schuldig worden bin, die selben funf phunt haller ich oder min erben den selben von Eppenberg oder iren erben vff den nechsten sant Johans tag ze sungichten, so nv schierest kumet nach dem tag, als diser brief geben ist, vnuerzogenlichen richten vnd bezaln sol. Tett ich des nit, wenn ich denn darnach von den selben von Eppenberg ermant wurde ze hus ze hof mit botten mit briefen oder vnder ogen, so sol ich mich inrent den nechsten acht tagen nach der manung gen Frowenuelt in die statt mit min selbes lib antwurten in offner wirtes huser vnd dannen nit ze komen ane der selben von Eppenberg willen, vntz ich si der vorgenanten funf phunt haller gantzlich bezalt han, vnd han och das gelobt bi miner truw an aides statt. Vnd des alles ze vrkund han ich der obgenant Vlrich Bettler min insigel offenlich gehenkt an disen brief. Ich Claus der Simler vogt ze Frowenuelt⁶ vergih, das dis offnung vnd dis vergiht offenlich vor mir veriehen volfurt vnd och beschehen ist, vnd des ze noch meren sicherhait han ich min insigel ze ainer statten zugnust och gehenkt an disen brief. Der geben ist an dem nechsten samstag vor vnsers herren vffart nach Cristus geburt tusent druhundert vnd nunzig jâren vnd dar nach in dem andern jâre.